Rusia dhe Turqia kanë rënë dakord që të koordinojnë operacionet tokësore në Siri pas lajmit për tërheqjen nga vendi të trupave ushtarake amerikane. Lajmi është konfirmuar nga ministri i Jashtëm rus, Sergei Lavrov. Ky i fundit tha se marrëveshja tregon se si delegatët e ushtrisë së Moskës dhe Ankarasë do të vazhdojnë të koordinojnë lëvizjet në terren sipas kushteve të reja me objektivin për të zhdukur kërcënimet terroriste në Siri.
Krerët e diplomacisë dhe të mbrojtjes të të dyja vendeve u takuan në Moskë, menjëherë pas lajmit për hyrjen e ushtrisë siriane në sektorin e Minbij, të kontrolluar nga kurdët. Një zhvillim shumë i rëndësishëm ky për Ankaranë e cila e konsideron zonën si thelbësore në luftën kundër militantëve kurdë dhe grupeve të lidhura me ta. Turqia nuk është shumë dakord me vendosjen e trupave qeveritare siriane në këtë zonë, ndërsa Kremlini e mirëpriti duke e cilësuar si një pasojë logjike të rekuperimit të sovranitetit sirian.
Ndërkohë grupi i parë i ushtarëve amerikanë është larguar nga Siria pas vendimit të presidentit amerikan Donald Tramo për tërheqjen e tyre. Lajmi u konfirmua nga agjencia turke e lajmeve Anadoll, e cila citon agjencinë ruse të lajmeve Tass. Sipas Anadoll, të premten të paktën 50 ushtarë kanë lënë armët dhe municionet në provincën siriane Al-Hasakah dhe u drejtuan për në Irak.
