Deputetja e PD, Flutura Açka komentoi dje situatën brenda Partisë Demokratike, ndërsa tregoi disa detaje rreth mbledhjes së tensionuar të Kryesisë, e cila u mbajt këtë javë. Teksa ishte e ftuar në një studio televizive, ajo tha se mbledhjen me dyer të mbyllura të PD, votoi pro për nisjen e një procesi për zgjedhjen e kryetarit të ri në 29 korrik, por jo për Bashën. Dje, në një intervistë televiizve, ajo tha se do të dëshironte që PD të vinte një figurë e re politike.
“Unë nuk kam votuar pro Bashës, por pro hapjes së procesit për hapjen e garës për kryetar. Unë kam transmetuar sugjerimet e bazës në Elbasan. Me hapjen e procesit, nuk do të thotë që po i hapet rruga Bashës. Ne jemi të përçarë, të mpirë dhe drejtimin e kësaj lufte e ka nisur Berisha duke na përçmuar. Ky pozicion i joni i brishtë ka qenë arsyeja se përse kam dashur që të hapet një proces për zgjedhjes së kreut të ri. Ky është moment historik për t’u ndarë nga e shkuara. Unë kam dëshirë të shoh në garë talente të reja politike, intelektualë, njerëz që kanë misione, PD duhet të hapet. Basha të fitojë në mënyrë të ndershme. Nëse ky proces do të manipulohet, do denoncoj dhe do distancohem publikisht”, deklaroi ajo.
Ndërkohë lidhur me tensionet ndodhur jashtë PD pas mbledhjes, ajo tha se nuk ka qenë e pranishme dhe se nuk ka parë se çfarë ka ndodhur. Sa i takon dorëheqjes së Tabakut si nënkryetare e PD, ajo tha se mendon se ishte emocionale, duke shtuar se do të dëshironte që kjo e fundit të garonte në 29 korrik.
“Në mbledhje, brenda ka qenë një debat konstruktiv, çfarë ka ndodhur jashtë nuk kam qenë e pranishme dhe nuk e di. Mbrëmë kam mësuar që edhe zonja Tabaku është fyer, ndërsa sot më tha që nuk ka ndodhur. Dorëheqja e Tabakut ishte besoj emocionale, por kjo nuk ka rëndësi. Nëse Tabaku hynë në garë për kryetare, unë do jem e para që do ta votoj. Nëse Berisha nuk largohet deri në shtator, mund të rrezikojmë zgjedhjet e 2025”, nënvizoi Açka.
