Gjykata ka dhënë masën “arrest me burg” për 31-vjeçarin, Gert Shehu, i cili më 6 Dhjetor sulmoi me grusht kryetarin e Partisë Demokratike, Sali Berisha.
Në një prononcim për mediat, avokati i Shehut, Ervis Lila, ka kërkuar masën “arrest shtëpie” ose shtrim të detyrueshëm në spital për shkak të gjendjes fizike dhe mendore të tij.
Mirëpo, kjo kërkesë u refuzua nga Gjykata të cilët morën vendimin për lënien në burg të 31-vjeçarit, i cili aktualisht vijon të jetë në Spitalin e Traumës për shkak të plagëve të marra nga truprojat e Berishës dhe simpatizantët.
Gert Shehu akuzohet për goditje për shkak të detyrës dhe plagosje me dashje. Gjatë marrjes në pyetje në ambientet e Spitalit të Traumës, Shehu nuk ka shfaqur pendesë për goditjen ndaj Berishës.
Përveç ekspertizës së gjendjes mendore, prokuroria ka dorëzuar në laboratorin e policisë shkencore mostra për të parë nëse 31-vjeçari ishte nën efektin e lëndëve narkotike ditën që ndodhi edhe ngjarja.
