Klement Balili, i ashtuquajtur si Eskobari i Ballkanit, “Baroni i drogës”, “Peshku i madh” apo “Magjistari” ndodhet tashmë në pranga.
Ndërkohë që Miliana Muça është zgjedhur gjyqtarja që do të shqyrtojë çështjen e Klement Balilit. Ajo u zgjodh pas hedhjes së shortit në trupën gjykuese.
Klement Balili pritet të dalë nesër para gjykatës së Krimeve të Rënda.
Pas më shumë se dy vitesh arrati, 46-vjeçari nga fshati Stjar i Delvinës i shumëkërkuar për trafik ndërkombëtar të drogës është vetëdorëzuar në polici.
Mësohet se Balili është dorëzuar mëngjesin e djeshëm nën shoqërinë e avokatit të tij mbrojtës, në prag të përfundimit të hetimeve dhe të dërgimit të dosjes së tij në gjykatë nga Prokuroria e Krimeve të Rënda.
Dorëzimi i tij u bë pas negociatave ku u përfshinë avokati i tij Theodhori Sollaku, drejtori i Policisë së Shtetit Ardi Veliu si dhe nipi i tij, i cili mban dhe postin e kryetarit të bashkisë Delvinë, Rigels Balili.
Vetë kreu i policisë, Ardi Veliu, shkoi në Delvinë për të ekzekutuar masën e sigurisë “arrest me burg” dhënë nga gjykata. Ai akuzohet për katër vepra penale dhe konkretisht: “Trafikim të lëndëve narkotike”, i kryer në bashkëpunim, në formën e grupit të strukturuar kriminal; “Pjesëmarrje në grupin e strukturuar kriminal”, “Refuzim për deklarim, mosdeklarim, fshehje ose deklarim i rremë i pasurive”, si dhe për “Pastrim parash”.
