Theodoros Pangalos, ish-shefi i diplomacisë greke dhe mbajtës i disa posteve të larta në qeveri përgjatë viteve, ka ndërruar jetë këtë të mërkurë në moshën 84 vjeçare. Familja ka ndarë lajmin e trishtë dhe thotë se Theodoros Pangalos ka qenë i rrethuar nga familja deri në momentet e fundit.
“I dashuri ynë Theodoros Pangalos na la sot, i qetë në shtëpi, me familjen dhe bashkëpunëtorët e ngushtë pranë tij. Udhëtim të mbarë i dashuri ynë. Do ju kujtojmë gjithmonë me dashuri”, thuhet në postimin e familjes së tij.
Theodoros Pangalos ka studiuar Drejtësi në Universitetin e Athinës dhe Ekonomi (Doktor i Shkencave Ekonomike) në Universitetin e Parisit I (Pantheon Sorbonne) me bursë nga qeveria franceze.
Me aktivitet të rëndësishëm në lëvizjen studentore dhe anëtar themelues i Rinisë Lambrakis, ai luajti një rol aktiv në luftën kundër diktaturës, si rezultat i së cilës iu hoq shtetësia greke nga junta në vitin 1968.
Nga viti 1969 deri në vitin 1978 ka punuar në Sorbonë si mësues dhe studiues i emëruar në zhvillimin ekonomik, planifikimin dhe planifikimin hapësinor. Ai ka qenë edhe Drejtor i Institutit të Zhvillimit Ekonomik të të njëjtit Universitet. Në vitin 1981 zgjidhet për herë të parë deputet i PASOK-ut, detyrë të cilën e mbajti në vazhdimësi deri në vitin 2012.
Zëvendësministër i Tregtisë (1982), Zëvendësministër i Punëve të Jashtme për Çështjet e Komunitetit Evropian (1984), Zëvendësministër i Punëve të Jashtme (1985-1989). Gjatë periudhës 1989-1993 ai u emërua Përfaqësues i Parlamentit Grek në Këshillin e Evropës.
Në tetor 1993 u betua sërish si zëvendësministër i Punëve të Jashtme. Në korrik të vitit 1994 mori detyrën e Ministrit të Transportit dhe Lidhjeve. Në janar 1996 u betua si Ministër i Punëve të Jashtme, duke kryer detyrën deri në shkurt të vitit 1999.
Në prill të vitit 2000 u betua si ministër i Kulturës, duke mbajtur detyrën deri në nëntor 2000. Shef i delegacionit grek në Asambleja Parlamentare e Bashkimit Evropian Perëndimor dhe Këshilli i Evropës.
Nga viti 2004 deri në zgjedhjet e 2009, Theodoros Pangalos përfaqësoi Parlamentin grek në Asamblenë Parlamentare të Bashkimit Evropian Perëndimor dhe në Këshillin e Evropës. Më 6 tetor 2009 u betua si zëvendëskryeministër. E mbajti detyrën deri në maj 2012.
