Ibsen Elezi, kandidat për kryetar të Partisë Demokratike, në një konferencë për mediat dje kërkoi shtyrjen e datës së zgjedhjeve. Por Komisioni i Organizimit në PD thotë se data 22 maj është vendosur në Kuvendin e 30 prillit.
“Data e zgjedhjeve për Kryetar të PD është miratuar me Vendim Nr. 2 të Kuvendit Kombëtar të PD datë 30 prill 2022. Kuvendi Kombëtar është organi më i lartë vendimmarrës në PD”, thuhet në reagimin zyrtar të PD, në përgjigje të kërkesës së Ibsen Elezit.
Komisioni fton të gjithë anëtarët e Partisë Demokratike të bëhen pjesë e fushatës për zgjedhjen e Kryetarit, që do të finalizohet në votimin në datë 22 maj 2022.
Referuar njoftimit, deri sot vetëm Sali Berisha ka paraqitur pranë Komisionit një kalendar takimesh në ditët në vijim, ndaj Komisioni ka kërkuar nga të dy përfaqësuesit e kandidatëve të paraqesin sa më parë një kalendar të plotë takimesh në mënyrë që të bëhen rakordimet dhe njoftimet e duhura në degët përkatëse.
