Deputeti i Partisë Socialiste për qarkun e Fierit, Petro Koçi, bëri më 16 korrik 2021 një deklaratë publike, me anë së cilës theksonte se në Fier duart e krimit janë shtrirë mbi financat publike.
Me anë të një statusi në llogarinë e tij në rrjetin social “Facebook” dhe në një deklaratë për mediat, Koçi akuzoi se tenderët publikë në Fier po fitoheshin nga organizatat kriminale që operojnë në këtë zonë.
“Protagonistë të trafikut të drogës dhe të dhunës tashmë kanë legalizuar subjekte biznesi që fitojnë tenderë publike. Këtë e realizojnë ose nëpërmjet lidhjeve të drejtpërdrejta me ndonjë titullar institucionesh ose nëpërmjet kërcënimit të zyrtarëve të caktuar që ekzekutojnë prokurimet si edhe nëpërmjet eliminimit të konkurrentëve në procesin e tenderimit duke kërcënuar pronarët e subjekteve të biznesit”, shkroi atëherë Koçi.
Bazuar në këto deklarata publike, Policia referoi kallëzim më 26 korrik 2021 në Prokurorinë e Posaçme kundër Korrupsionit dhe Krimit të Organizuar, SPAK-u që sqaroi atëherë se kishte filluar verifikimin e rastit.
Rreth dy muaj më vonë, bazuar vetëm në një veprim hetimor, marrjen e deklarimeve të deputetit Petro Koçi në cilësinë e personit që ka dijeni mbi veprën penale, SPAK-u ka vendosur mos fillimin e procedimit penal.
AKUZAT PËR PASTRIM PARASH
Në vendimin e mosfillimit të procedimit penal të nënshkruar nga prokurori Edvin Kondili pasqyrohen fillimisht deklaratat publike të deputetit Koçi për ndikimin e organizatave kriminale tek zyrtarët në institucionet e Fierit, si dhe për përfitimin e fondeve publike prej tyre.
Në vijim radhiten deklarimet e Koçit në cilësinë e personit që ka dijeni mbi veprën penale, ku ai është shprehur se nuk di asgjë konkrete.
SPAK-u i ka kërkuar fillimisht deputetit të PS-së që të japë më shumë detaje lidhur me pretendimet e tij të publikuara në rrjetin social “Facebook”, si dhe në intervistën që ka dhënë në televizionin “Report TV”.
Koçi ka shpjeguar se këto deklarime i ka bërë për të inkurajuar dhe përgëzuar rezultatet e reformës në drejtësi, si dhe punën që po bënë SPAK në lidhje me luftën kundër korrupsionit dhe krimit të organizuar.
“Si dhe për të inkurajuar qytetarët dhe zyrtarët e niveleve të ndryshme për t’i rezistuar presioneve të krimit dhe për ti denoncuar rastet e korrupsionit.
Gjithashtu i kam bërë këto deklarata dhe për të dekurajuar botën e krimit”, ka deklaruar Koçi dhe ka shtuar se në gjykimin e tij, subjekte të ndryshëm të botës së krimit kanë pastruar para në fushën e ndërtimit.
“Jam i bindur se këto aktivitete, pa bashkëpunimin e zyrtarëve publikë, nuk do të kryheshin”, ka dhënë Koçi opinionin e tij para hetuesve të SPAK-ut.
PËRBALLJA NË SPAK
Koçi është përballur edhe me një pyetje tjetër në SPAK, ku i është kërkuar të deklaronte nëse kishte ndonjë informacion konkret për subjektet e krimit të organizuar, zyrtarët publikë dhe për cilat raste bëhej fjalë.
Deputeti Koçi është përgjigjur se deklarimet e tij kanë qenë të përgjithshme dhe në pasqyrim të perceptimit të elektoratit.
“Por nuk kam pasur të bëj me individë apo raste konkrete, pasi unë siç kam vepruar dhe në raste të shkuara, do të bëja kallëzim penal nëse do të kisha informacione të tilla dhe nuk do të mjaftohesha me deklarata publike. Unë kam bindjen që institucionet ligjzbatuese, lokale apo qendrore, disponojnë të dhëna konkrete në lidhje me subjektet e botës së krimit që operojnë në qytetin e Fierit”, ka pohuar Koçi dhe ka shtuar se deklarimet e tij nuk janë mirëpritur nga shumë zyrtarë lokalë.
Bazuar në këto shpjegime të deputetit Koçi, SPAK konstaton se ai nuk disponon asnjë provë, asnjë informacion konkret, asnjë fakt dhe asnjë dëshmitar në lidhje me pretendimet e tij dhe për rrjedhojë konkludon se nuk provohet ekzistenca e ndonjë fakti penal, duke vendosur mos fillimin e procedimit penal.
I pyetur nga BIRN lidhur me ndryshimet e deklarimeve publike me ato të dhëna në SPAK, Koçi këmbënguli se ishin të njëjta.
“S’ka asnjë ndryshim mes deklaratave të mia në publik me ato në SPAK. Por, unë nuk zëvendësoj as drejtësinë dhe as policinë. Fenomenet janë ashtu si i kam denoncuar politikisht. Unë e kam për detyrë të përfaqësoj politikisht vlerësimin e zgjedhësve si edhe timin personal për zhvillime dhe fenomene që janë shqetësuese për shoqërinë dhe shtetin”, u shpreh Koçi nëpërmjet aplikacionit “WhatsApp”.
Si nisën hetimet nga SPAK pas deklaratave të bujshme
Përplasjet midis socialistëve të Fierit nisën në korrik të vitit të shkuar. Deputeti Petro Koçi, i deleguar në krye të PS-së së Fierit, hodhi akuza të forta ndaj disa institucioneve të drejtuara nga socialistët, të cilat sipas tij kishin ndikuar në rezultatin e zgjedhjeve. Ai përmendi edhe tenderët e zhvilluara atje.
Denoncimin e tij Koçi e shtjelloi edhe në një intervistë për “News 24”, ku sqaroi se si përfitojnë grupet kriminale nga paratë e taksapaguesve.
“Në çdo qytet gjen raste kur pallatet i kanë ndërtuar disa të fortë. Fieri ka protagonistë kriminalë, ndaj duhet t’i bashkohemi këtij optimisti për të luftuar krimin. Ata futen në lloj-lloj tenderësh. Kanë bërë subjekte legale. Kudo futen. Mekanizmi është ky: ose kanë lidhje drejtpërdrejtë me një zyrtar që administron financat publike, ose kërcënon zyrtarët, ose anëtarët e komisioneve që bëjnë tenderë, njerëz të thjeshtë. Ata janë njerëz të zakonshëm që ndoshta kërcënohen. Dhe e treta, duke kërcënuar rivalët, konkurrentët e së njëjtës natyrë biznesi. Kjo mendoj se është si mekanizëm. Nuk është se këta dominojnë në gjithçka, por kapin dhe fonde publike. Megjithëse ligji është forcuar, ka manovra që edhe ky ligj nuk i parashikon. Ka subjekte që janë indirekt të tyre dhe është e vështirë që të interpretosh. Thirrja ime është që kjo teknologjia e luftës ndaj krimit të përforcohet”, tha kreu i PS-së së Fierit.
Bazuar në deklarata të tilla, më 22 korrik 2021, Struktura e Posaçme kundër Korrupsionit dhe Krimit të Organizuar nisi verifikimet pas deklaratave të zëvendësministrit të Mbrojtjes.
Lajmi u konfirmua nga kreu i SPAK, Arben Kraja, i cili ka bërë me dije se pas indiceve të dhënë nga deputeti i zgjedhur në qarkun e Fierit, hetuesit kanë filluar nga puna.
© Panorama.al
