Kandidati i koalicionit “Bashkë Fitojmë” për Bashkinë e Elbasanit Luçiano Boçi ka deklaruar ditën e djeshme se ka qenë nën përgjim nga ana e Prokurorisë së Elbasanit para zgjedhjeve të 14 Majit.
Boçi u shpreh se kjo është bërë në mënyrë sistematike që nga muaji prill me qëllimin për të krijuar një skenar të ngjashëm me atë në Bashkinë e Himarës, ku kandidati Fredi Beleri u arrestua para procesit zgjedhor.
Sipas tij për këtë skenar u bënë bashkë policia, prokuroria dhe Partia Socialiste në mënyrë që kandidati i tyre pa program të shpallej fitues në numra.
“Publiku ka njohur një ngjarje përgjatë këtyre ditëve në Elbasan ku prokurori doli me një njoftim të bujshëm sikur arrestoi një grup të fuqishëm kriminal prej 40 vetash si rezultat i një aksioni që kishte që në prill që vepronte me përgjime ambientale.
Po prokuroria e nisi një përgjim ambiental në Elbasan me dy pajisje më të fundit por nuk i solli për të përgjuar grupin kriminal pasi ata nuk janë kriminal por pajisjet u sollën për të përgjuar kandidatin e opozitës shtabin elektoral të tijin bashkëpunëtorët e tij politik dhe kjo është bërë që nga prilli në mënyrë sistematike në mënyrë që të krijonin një skenar të ngjashëm si të Himarës por nuk patën fatin dhe për të justifikuar të gjithë këtë veprimtari dolën dhe deklaruar në mënyrë bombastike arrestimin dhe i nisen me autobus për në Tiranë.
Kjo është e vërteta se si u bashkuan dhe u bënë një policia prokurori PS administrata që vetëm e vetëm që kandidati i tyre pa program dhe që shkeli ligjin përgjatë gjithë kohës të merrte ato numra me demek fitues në numra por jo para opinionit”, ka deklaruar ai.
