“Kolegji Zgjedhor justifikoi politikisht paligjshmërinë e veprimtarisë së organizatës socialiste në KQZ dhe është një përpjekje e dëshpëruar për të ndërtuar një operacion propagandistik brenda dhe jashtë vendit për të anatomuar indirekt vendimin e kreut të shtetit por kurrsesi ky është një operacion i dështuar pasi nuk prek aspak vlefshmërinë e dekretit të Presidentit të Republikës së Shqipërisë.”
Ky është sot reagimi i presidentit Ilir Meta një ditë pas vendimit të Kolegjit Zgjedhor i cili rrëzoi padinë e Partisë për Unitet Kombëtar për tu çrregjistruar nga zgjedhjet për shkak të dekretit të Kreut të Shtetit.
Në një dalje për median mëngjesin e sotëm, 25 qershor, Meta i quajti zgjedhjet më 30 qershor “imagjinare” dhe se vendimin e Kolegjit Zgjedhor “një truk procedurial” për të justifikuar veprimtarinë e organizatës socialiste të KQZ-së dhe për të ndërtuar një operacion propagandistik”.
Vendim i Kolegjit Zgjedhor, – tha Meta- i orkestruar dhe i paralajmëruar prej kohësh është marrë në kushtet e presionit dhe shantazhit politik të mazhorancës.
Kreu i shtetit nënvizoi edhe një herë se është vetëm “Gjykata Kushtetuese ajo mund të shqyrtojë vlefshmërinë e dekretit të tij” dhe i bëri thirrje mazhorancës “të tërhiqet nga thellimi në paligjshmëri dhe shantazhet ndaj instituticioneve të pavarura pasi asnjë dhe askush nuk do ta justifikojë përballë ligjit.”
Presidenti insiston se: Zgjedhje më 30 qershor ligjërisht nuk ka dhe nuk do të ketë dhe e vetmja rrugë për zgjidhjen e krizës, mbetet vetëm dialogu politik dhe respektimi i ligjit nga të gjithë.
