Trupat ruse kanë arrestuar drejtorin e termocentralit bërthamor të Zaporizhzhia të Ukrainës. Sipas rregullatorit shtetëror bërthamor të Ukrainës, Enerhoatom, ai u kap teksa po udhëtonte me makinë nga objekti për në qytetin e afërt të Enerhodar rreth orës lokale 16:00 të së premtes.
Ihor Murashov iu lidhën sytë dhe u dërgua në një vend të panjohur, informon Enerhoatom.
Rusia nuk ka komentuar pretendimet. Moska kapi centralin më të madh bërthamor në Evropë në mars dhe mbajti stafin e saj ukrainas.
Si Ukraina ashtu edhe Rusia akuzojnë njëra-tjetrën për bombardimet e vazhdueshme të uzinës, mes shqetësimeve globale se kjo mund të çojë në një incident të madh rrezatimi në Evropë.
Ihor Murashov
Në një deklaratë, presidenti i Enerhoatom, Petro Kotin tha se Murashov “mban përgjegjësinë kryesore dhe ekskluzive për sigurinë bërthamore dhe rrezatuese” të centralit bërthamor.
Sipas Kotin, kapja e tij “vë në rrezik sigurinë e funksionimit të Ukrainës dhe termocentralit më të madh bërthamor në Evropë”.
Kotin i bëri thirrje Agjencisë Ndërkombëtare të Energjisë Atomike për të kërkuar lirimin e menjëhershëm të shefit të centralit, duke akuzuar Rusinë për “terrorizëm bërthamor”.
Centrali bërthamor me gjashtë reaktorë Zaporizhzhia ndodhet pranë Enerhodar, në pjesën e pushtuar të rajonit jugor të Ukrainës Zaporizhzhia.
Ukraina thotë se trupat ruse po përdorin stacionin si bazë ushtarake dhe se punonjësit në fakt mbahen nën kërcënimin e armëve.
Të premten, presidenti rus Vladimir Putin deklaroi aneksimin e rajoneve Zaporizhzhia, Kherson, Donetsk dhe Luhansk, një veprim i dënuar gjerësisht nga Ukraina dhe Perëndimi.
Moska nuk kontrollon plotësisht asnjë nga katër rajonet në lindje dhe jug të Ukrainës.
