Rusia ka thënë këtë të martë se po tërheq disa nga forcat e saj pranë kufirit ukrainas në bazat e tyre, në atë që është hapi i parë i madh drejt de-përshkallëzimit në javët e krizës me Perëndimin. Kjo masë vjen pas përpjekjeve diplomatike intensive për të shmangur një pushtim të frikshëm rus.
Kriza – më e keqja midis Rusisë dhe Perëndimit që nga fundi i Luftës së Ftohtë – arriti kulmin këtë javë me zyrtarët amerikanë që paralajmëruan se një pushtim në shkallë të plotë, duke përfshirë një sulm në kryeqytetin Kiev, ishte i mundur brenda disa ditësh.
Në mëngjesin e së martës, zëdhënësi i ministrisë ruse të mbrojtjes tha se disa forca të dislokuara pranë Ukrainës kishin përfunduar stërvitjet e tyre dhe po bënin gati “mjetet e tyre” për t’u larguar, raportojnë mediat ndërkombëtare.
“Njësitë e distrikteve ushtarake jugore dhe perëndimore, pasi kanë përfunduar detyrat e tyre, tashmë kanë filluar ngarkimin në transportin hekurudhor dhe rrugor dhe sot do të fillojnë të lëvizin në garnizonet e tyre ushtarake”, tha zëdhënësi kryesor i ministrisë, Igor Konashenkov, për agjencitë ruse të lajmeve.
Nuk ishte menjëherë e qartë se sa njësi ishin të përfshira dhe çfarë ndikimi do të kishin tërheqjet në numrin e përgjithshëm të trupave që rrethonin Ukrainën, por ishte njoftimi i parë i një tërheqjeje ruse.
