Kriza politike, korrupsioni dhe siguria ligjore janë disa nga faktorët që kanë ndikuar në përkeqësimin e situatës ekonomike në vend. Gjatë prezantimit të anketimit mbi ecurinë ekonomike për vitin 2019 ambasadorja gjermane u shpreh se në krahasim me 2018 ekonomia paraqitet më keq.
Bizneset gjermane e vlerësojnë në përkeqësim situatën ekonomike në Shqipëri gjatë vitit 2019. Ambasadorja gjermane, Susanne Schütz, gjatë prezantimit të anketimit, theksoi se 51% e bizneseve janë pesimistë për ecurinë e ekonomisë gjatë këtij viti dhe kjo lidhet me emigrimin e lartë të punonjësve të kualifikuar.
Susanne Schütz: “Në tërësi, për fat të keq këtë vit konstatojmë një përkeqësim të situatës ekonomike. Pak më shumë se 50 % e bizneseve e vlerësojnë me keq situatën ekonomike në Shqipëri, ndërkohë që vitin e shkuar ishin 39%. Pritshmëritë ekonomike të sipërmarrjeve janë trazuar dukshëm, nga 36 % vitin e shkuar në 13 për qind këtë vit. Ne jemi përqendruar te fenomeni i emigrimit që është një vështirësi e shtuar për bizneset. Nëse punonjësit e kualifikuar emigrojnë kjo nuk është vetëm një perceptim pasi kjo ndikon ndjeshëm në ekonomi.”
Drejtori i Dhomës gjermane të Industrisë dhe Tregtisë e lidh këtë perceptim me krizën politike si dhe me sigurinë ligjore dhe korrupsionin
Bledar Mankollari: “Bizneset përceptojnë një rënie të madhe në stabilitetin politik e sociale dhe marrin një notë shumë negative. Ndryshimi më i madh është midis 2018 dhe 2019.”
Ndërsa zv/ministrja Belinda Ikonomi u shpreh se janë marrë masa për të luftuar burokracitë dhe korrupsionin
Belinda Ikonomi: “Është padyshim shumë e nevojshme vazhdimi i reformave rregullatore dhe mirëqeverisja në çdo sektor.”
Sipas bizneseve gjermane edhe ecuria e investimeve kapitale ka mbetur e pandryshueshme.
Faktorët e vlerësuar më negativisht:
- Siguria ligjore
- Administrata Publike
- Parashikueshmëria e politikave ekonomike
- Transparenca e tenderave publike
- Lufta kundër kriminalitetit dhe korrupsionit
- Kriza politike
Situata ekonomike aktuale sipas anketës:
51% Keq
36% Kënaqshëm
13% Mirë
