Ministrja për Evropën dhe Punët e Jashtme, Olta Xhaçka këtë fundjavë do të udhëtojë drejt New York-ut, ku do të marrë pjesë në Asamblenë e Përgjithshme të Organizatës së Kombeve të Bashkuara.
Më 11 qershor pritet të votohet për zgjedhjen e Shqipërisë, si anëtare jo i përhershme e Këshillit të Sigurimit, për periudhën kohore 2022 – 2023.
Xhaçka ka zhvilluar një takim ditën e sotme me Ambasadoren e SHBA në Tiranë, Yuri Kim, ku ka thënë se votimi i Shqipërisë në Këshillin e Sigurimit është një mundësi historike për diplomacinë shqiptare.
Ndërsa ambasadorja Kim thotë se kjo është një mundësi e madhe që Shqipëria të forcojë rolin e saj në rajon dhe më gjerë.
‘“Gjithmonë kënaqësi të takohem me Ministren e Jashtme Olta Xhaçka. Kemi një mundësi të madhe para nesh për të përforcuar marrëdhëniet SHBA-Shqipëri në bashkëpunimin për demokracinë, mbrojtjen dhe biznesin. Ne e mirëpresim rolin gjithnjë e në rritje të Shqipërisë në skenën rajonale dhe globale. Krah për krah”, shkruan ambasadorja Kim.
Deklarata e Xhaçkës:
Përgatitjet vazhdojnë me shpejtësi për këtë mundësi historike për diplomacinë shqiptare
Shqipëria paraqitet në këto zgjedhje si kandidaturë konsensuale e Grupit të Vendeve të Evropës Lindore, duke e mbështetur këtë kandidaturë në 5 prioritetet kryesore:
-Respektimi i të drejtave të gruas, si kontribut për paqe dhe siguri të qëndrueshme;
-Respektimi i të drejtave të njeriut dhe i ligjit ndërkombëtar;
-Lufta kundër ekstremizmit të dhunshëm dhe terrorizmit;
-Ndryshimet e klimës dhe lidhjet e tyre me rreziqet ndaj sigurisë globale;
-Metodat e punës të Këshillit të Sigurimit;
