Ish-kryeprokurori shqiptar Adriatik Llalla do të rigjykohet nga e para. Llalla akuzohet për fshehje të pasurisë në tre episode, ndërsa SPAK më herët ka kërkuar 2 vite burg për të.
Seanca që është mbajtur sot në Gjykatën e Posaçme dhe ku ka marrë vetë pjesë ish-kryeprokurori, ka përfunduar pak më parë dhe është vendosur që gjyqi ndaj Adriatik Llallës të rinisë nga e para. Ka qenë vetë Llalla që më herët ka pranuar fajësinë dhe ka kërkuar gjykim të shkurtuar.
Ndërkohë, sot kërkesa për gjykim të shkurtuar që në thelb ka të bëjë me kërkesën e vetë të akuzuarit për pranimin e fajsisë, është rrëzuar. Pritet që vetë Gjykata të dalë me një njoftim për këtë vendim dhe procedurat e mëtejshme.
Më herët me urdhër të SPAK, Gjykata e Posaçme e Apelit ka vendosur në sekuestro pasuritë e Adriatik Llallës, si më poshtë:
– Apartament banimi, me sipërfaqe 67.2 m², ndodhur në Durrës;
– Tokë arë, me sipërfaqe 4.500 m², ndodhur në Tiranë;
– Tokë arë, me sipërfaqe 12.300 m², ndodhur në Tiranë;
– Tokë arë, me sipërfaqe 3000 m², ndodhur në Tiranë;
– Tokë arë, me sipërfaqe 2250 m², ndodhur në Tiranë.
