Kryeministri Edi Rama ka vijuar me gjuhën e ironisë ndaj deputetit demokrat Edi Paloka, i cili gjatë seancës së sotme parlamentare hodhi bojë ndaj tij.
Për këtë ai publikoi një fotografi të një shiringe ku shkruan, “Penda e mendimtarit E.Th.Palotha pas një derdhjeje të fuqishme mendimesh mbi rolin e opozitës në zhvillimin e vendit”.
Po ashtu, Rama shton se “Dy gjëra janë të pafundme, universi dhe budallallëku i njeriut”, shkruante Albert Ainshtajni, përpara se sa opozita në Shqipëri të merrte formën e një Budallallëku Universal, që vizion ka Vezën e Lulit, ide ka Çizmen e Doktoreshës dhe program ka bojën e Palothës”.
Më herët në një komunikim me mediat, Paloka tha se hedhja e bojës prej tij në Kuvend, ndaj Kryeministrit Edi Rama gjatë seancës së sotme, ishte vetëm fillimi i protestës së të shtunës.
“Është vetëm fillimi i 16 shkurtit, s’ka parë asgjë akoma ai Kryeministër”, u tha Paloka gazetarëve.
Ndërsa pyetjes nëse në këtë mënyrë paralajmëron trazira gjatë protestës, Paloka deklaroi “I thoni Kryeministrit që realisht, nuk ka parë asgjë akoma!”
Po ashtu ai shtoi se parlament është i qelbur kokë e këmbë dhe se është parlament i përjashtuar nga populli.
Ndër të tjera deklaroi se goditja me bojë, nuk ishte hakmarrje e Edi Palokës, por e shqiptarëve që përditë fyhen dhe vidhen nga një Kryeministër arrogant.
Pak pas ngjarjes në parlament, Partia Demokratike sqaroi arsyen se pse deputeti demokrat qëlloi me bojë Kryeministrin, duke thënë se “Edi Paloka e gjuajti me bojë Edi Ramën, pasi ky e talli në mënyrë të përsëritur për shkak të mënyrës së të folurit. Gjuajtja me bojë është mospranim i bullizmit të ushtruar nga Kryeministri për të cilin është dëshmitar i gjithë opinion publik”.
Video më poshtë tregon momente nga seanca e kaluar parlamentare ku Rama ironizon mënyrën e të folurit të Palokës dhe sulmin me bojë.
