Taylor Swift ka ndërmarrë për herë të parë një qëndrim ndaj politikës amerikane, duke mbështetur publikisht dy demokratë përpara zgjedhjeve të mesmandatit.
“Në të kaluarën kam qenë ngurruese për të shprehur publikisht mendimin tim politik, por për shkak të disa ngjarjeve që kanë ndodhur në jetën time dhe në botë përgjatë këtyre dy viteve të fundit, ndihem shumë herë më e lirshme rreth kësaj çështjeje tani”, shkruante Swift në rrjetet sociale që prej mesnatës së të dielës, madje duke u bërë thirrje fansave të saj të rinj që të regjistrohen dhe të votojnë.
“Unë kam votuar gjithmonë dhe do të votoj gjithmonë, bazuar mbi atë se cili kandidat do të mbrojë dhe luftojë për të drejtat e njeriut, që unë besoj se të gjithë ne meritojmë në këtë vend. Unë besoj në luftën për të drejtat e homoseksualëve dhe se, çdo formë diskriminimi mbi orientimin seksual apo gjininë është i gabuar. Unë besoj se racizmi sistematik që ne shohim në këtë vend kundrejt njerëzve me ngjyrë është i tmerrshëm, i sëmurë dhe dominues. Nuk mundem të votoj për dikë, i cili nuk ka vullnetin për të luftuar për dinjitet për të gjithë amerikanët, pavarësisht nga ngjyra e lëkurës, gjinia apo cilët njerëz dashurojnë ata”.
