Ish kryeministri Sali Berisha ka folur mbi takimin që ka zhvilluar me kryetarin e Partisë së Lirisë, Ilir Meta. Berisha tha se nuk ka një datë fikse për protestat e shtatorit, por që me Metën është rëndë dakord për një aksion të fuqishëm opozitar.
Sali Berisha: “Jam takuar me zotin Meta. Nuk kemi fiksuar datë për protestë.
Kemi rënë dakord për një aksion të fuqishëm opozitar për përballje me këtë regjim, që po shtrëngon çdo ditë e më shumë monizmin e tij në vend, vjedhjet dhe plaçkitjet e qytetarëve shqiptarë dhe sundimin e krimit”.
Berisha: Treni i PD-së nuk ndalet
I pyetur lidhur me ndarjen e PD në dy kampe dhe gjatë këtij sesioni të ri parlamentar, Berisha theksoi:
“PD është e pandalshme në rrugën e objektivave të saj. Ajo natyrisht mbetet e hapur. Por besoj se treni i saj është absolutisht i pandalshëm. Gjatë një viti u bënë të gjitha përpjekjet për ta ndalur por ai vetëm sa rriti. Kështu që nuk ndalet treni i PD-së”.
