Sali Berisha përjashtohet përgjithmonë nga Partia Demokratike. Të njëjtin fat kanë dhe disa nga anëtarët e Komisionit të Rithemelimit të kësaj force politike që i dolën kundër Lulzim Bashës dhe strukturave të tjera të Partisë.
Pas 8 orësh mbledhje të jashtëzakonshme në selinë blu, nën drejtimin e Lulzim Bashës, Kryesia e PD ka marrë disa vendime të rëndësishme. Një prej tyre lidhet me protestën e thirrur nga Sali Berisha në datë 8 Janar, ku u tentua marrja e selisë së PD por plani dështoi.
Mbledhja filloi pasditen djeshme dhe ka mbaruar në orët e para të mëngjesit të sotëm. Me urdhër të kryetarit Lulzim Basha, të gjithë anëtarëve të Kryesisë u janë mbledhur celularët që të mos dilnin informacione në media dhe diskutimet kanë vijuar normalisht.
Kryesia e Partisë Demokratike, një nga strukturat më të larta të partisë, ka vendosur dhe përjashtimin nga kjo forcë politike të shtatë (7) anëtarëve të Grupit të Rithemelimit, i cili supozohej të merrte në dorë drejtimin e PD pas Kuvendit të 11 dhjetorit, të Sali Berishës.
Ish-kryeministri dhe lideri histrorik i PD është përjashtuar i pari. Më parë, ai është përjashtuar dhe nga çdo mundësi vendimmarrje në parti, përmes një mekanizmi që u fut në statut, që personat e shpallur “non grata” të mos kishin asnjë rol në PD.
Emrat e 7 anëtarëve që tashmë nuk janë më pjesë e PD, sipas Kryesisë:
Bujar Nishani
Flamur Noka
Albana Vokshi
Edmond Spaho
Arben Ristani
Klevis Balliu
Keltis Kruja
Në mbledhjen e nisur pasditen e djeshme rreth orës 19.00 dhe që ka përfunduar në 03:30 të mëngjesit të sotëm, është vendosur që të pezullohen 21 anëtarët e tjerë të Grupit të Rithemelimit, i cili në total ka 29 persona. Por Berisha dhe 7 të tjerë janë përjashtuar përgjithmonë.
Pritet që ky vendim i Kryesisë t’i kalojë më pas për miratim Këshillit Kombëtar, si organi më i lartë vendimmarrës në Partinë Demokratike.
21 anëtarët e tjërë të Grupit të Rithemelimit që janë pezulluar nga PD, sipas Kryesisë:
Agron Shehaj
Aldo Bumçi
Belind Këlliçi
Blendi Himçi
Çlirim Gjata
Edit Harxhi
Edi Paloka
Eno Bozdo
Ervin Minarolli
Evi Kokalari
Genc Deromemaj
Genc Pollo
Genti Strazimiri
Grigels Muçollari
Ivi Kaso
Ledina Mandia
Luan Baçi
Lorenc Luka
Mimoza Hadarmataj
Oerd Bylykbashi
Tritan Shehu
