Nënkryetari i Partisë së Lirisë, Petrit Vasili ka komentuar situatën e krijuar në Kuvend, ku seanca e ditës së sotme (e hënë, 20 Nëntor) u zhvillua mes tensioneve dhe tymueseve.
Përmes një postimi në Facebook, Vasili shkruan se Parlamenti është zaptuar nga Garda dhe “de jure dhe de facto ka rënë”
“Kushtetuta e Shqipërisë është kthyer në rregullore të Gardës”, shkruan deputeti duke iu referuar pranisë së Gardës si gjate seancës.
Postimi i plotë i Petrit Vasilit:
Parlamenti i zaptuar nga Garda de jure dhe de facto ka rënë!
Parlamenti është totalisht i zaptuar nga Garda dhe në këtë mënyrë është ligjëruar rënia e tij.
Kushtetuta e Shqipërisë është kthyer në rregullore të Gardës.
Rregullorja e Kuvendit është kthyer në Rregullore të Gardës.
Në sallën e Kuvendit s’ka asnjë të drejtë të hyjë kërrkush përveç deputetëve.
Grusht i shtetit i qeverisë mbi Parlamentin është fakt publik në sytë e të gjithë botës!
