Një vit nga Konferenca Ndërkombëtare të Donatorëve, ku Shqipëria siguroi rreth 1.15 miliardë euro fonde për rindërtimin pas tërmetit të 26 nëntorit 2019, qeveria ka arritur të vendosë në punë më pak se gjysmën e saj.
Kryeministri Edi Rama, i ekzaltuar nga rezultatet e Konferencës së Donatorëve, të zhvilluar në Shkurt 2020, deklaroi se deri në fund të vitit të kaluar, pjesa më e madhe e banorëve të dëmtuar nga tërmeti do të merrnin shtëpi të re.
Por, ndërkohë që ka nisur viti 2021, në asnjë prej zonave të prekura nuk ka nisur rindërtimi i banesave apo pallateve.
Vetëm në një pjesë të vogël të territorit të dëmtuar ka nisur rrëzimi i godinave të ndërtuara dhe përgatitja e shesheve të ndërtimit.
Një nga shkaqet kryesore të vonesave të tepruara në procesin e Rindërtimit duket se është lëvizja e ngadaltë e qeverisë për të vendosur në punë fondet e siguruara nga Konferenca e Donatorëve.
Prej muajit Mars 2020 e deri më tani, qeveria shqiptare, rezulton se ka tenderuar rreth 500 milionë euro, shumë e cila është më pak se sa gjysma e asaj që Shqipëria siguroi nga donatorët ndërkombëtarë dhe që menaxhohet nga Ministri për Rindërtimin, Arben Ahmetaj.
Tenderat për procesin e rindërtimit janë kryer me procedura të kufizuara dhe janë shpallur në Buletinë të Posaçëm të Prokurimit Publik.
Boldnews.al” konsultoi të dhënat e publikuara në mbi 40 Buletinë të Posaçëm, nga 10 Marsi 2020 e deri në fillim të Shkurtit 2021.
Nga hulumtimi rezultoi se qeveria shqiptare, nëpërmjet institucioneve qendrore dhe vendore, ka shpallur tendera me vlerë totale 62 miliardë lekë të reja, ose 500 milionë euro.
Tenderat e shpallur përfshijnë të gjithë gamën e procesit të Rindërtimit, përfshirë inspektimin, studimin dhe projektimin e zonave të reja, rrëzimin e godinave të dëmtuara, rindërtimin, mbikëqyrjen dhe kolaudimin e punimeve, si edhe transportin e mbetjeve.
Fondi Shqiptar i Zhvillimit ka shpallur tenderat me fondin më të lartë, rreth 35 miliardë lekë të reja.
Më pas renditet Bashkia e Tiranës, cila ka prokururar deri më tani 23.3 miliardë lekë të reja.
Bashkia e Durrësit ka shpallur tendera për procesin e Rindërtimit në një total prej afërsisht 1.1 miliardë lekë të reja
Në vijim, lista pasohet nga Bashkia e Kurbinit dhe Bashkia e Lezhës, të cilat kanë kryer procedura prokurimi publik që lidhen me Rindërtimin në shifra afërsisht 1 miliardë lekë të reja dhe 500 milionë lekë të reja.
Lista e institucioneve prokuruese për tendera në shifra më të ulta vijon me Bashkitë Krujë, Kamëz, e Kavajë, Autoritetin Rrugor Shqiptar, Agjencinë e Planifikimit të Territorit dhe Institutin e Trashëgimisë Kulturore.
