Kreu i Partisë Mundësia, Agron Shehaj, ka deklaruar në emisionin “Kjo Javë” se kryeministri Edi Rama është nën shënjestrën e SPAK. Deputeti i “Mundësisë” theksoi se ka një vullnet dhe këmbëngulje të ndërkombëtarëve që të korruptuarit duhet të dalin para drejtësisë.
“Ditën që do të shohim përplasjen mes SPAK dhe qeverisë, do të kuptojmë që drejtësia po vepron dhe nuk pyet për asnjë.
Nisi kur Rama tha guxoni të më merrni telefonin, aty ishte fillimi i përplasjes që ka ndodhur në heshtje deri tani.
Para pak ditësh Rama tha që kanë marrë peng Veliajn, që është një akuzë shumë e rëndë ndaj SPAK-ut.
Drejtësia ka vetëm një mundësi për të luftuar korrupsionin, të shkojë tek Rama. Për këtë jam i bindur.
Ka një vullnet dhe këmbëngulje ndërkombëtare që të korruptuarit duhet të dalin para drejtësisë”, tha Shehaj.
Më tej, kreu i Partisë Mundësia nënvizoi se është kundër një qeverie teknike ndërsa shtoi se ajo që është e nevojshme, janë zgjedhjet e lira dhe të ndershme.
“Absolutisht jo, sepse nuk jemi gati të ulemi apo të bëhemi pjesë me askënd. Me këta politikanë të korruptuar me të cilët të krijojmë qeveri. Duam që në Shqipëri të ketë zgjedhje të lira e të ndershme, kush është më i zoti të marrë më shumë vota. Nëse duan qeveri tranzitore ta gëzojnë”, tha ai.
