Në Gjykatën Themelore të Prishtinës dëshmoi sot në 29 janar Naim Murseli, i dyshuari për organizimin e vrasjes së gruas së tij, Liridona Ademaj. Para trupit gjykues, Murseli deklaroi se gjatë gjithë viteve të martesës kishte pasur një marrëdhënie të mirë me të ndjerën dhe se ajo nuk kishte shprehur kurrë pakënaqësi në raportin e tyre.
“Me Liridonën u fejuam në vitin 2010 dhe u martuam më 11 dhjetor 2011. Kemi 12 vite martesë dhe dy fëmijë. Marrëdhënia jonë ka qenë shumë e mirë, e lumtur. Liridona ishte një grua e mrekullueshme, nënë e përkushtuar dhe bashkëshorte e devotshme. Jetonim në Suedi, ku ajo mori edhe shtetësinë suedeze pas tre vitesh”, tha Murseli.
Ai tregoi se dëshira më e madhe e Liridonës ishte të bëhej nënë, por për pesë vjet ajo kishte vështirësi për të mbetur shtatzënë. Pas shumë përpjekjesh dhe vizitash në spitale, në vitin 2017 ata u bënë prindër të fëmijës së parë, ndërsa pas një viti e gjysmë lindi edhe fëmija i dytë. Murseli shtoi se marrëdhënia e tyre ka qenë gjithmonë e mirë dhe nuk ka pasur dhunë ose ndarje.
Naim Murseli u soll në gjykatë nën masa të rrepta sigurie dhe me pranga në duar, së bashku me Granit Plavën dhe Kushtrim Kokallën, të dyshuar gjithashtu për përfshirje në këtë krim.
Gjyqi ndaj tre të akuzuarve, të dyshuar për planifikimin dhe kryerjen e vrasjes së Liridona Ademajt, ka përfunduar për këtë seancë. Seanca e radhës është caktuar për më 11 shkurt në Gjykatën Themelore të Prishtinës.
