Bordi i transparencës ka ndërhyrë sërish te çmimi i karburanteve duke rishikuar me rritje çmimet tavan si për naftën, ashtu edhe për benzinën.
Sipas çmimeve të reja, nafta do të shitet me 215 lekë për litër në tregun e pakicës, ose 6 lekë më shtrenjtë nga çmimi i fundit tavan.
Në tregun e shumicës, nafta do të shitet me 203 lekë. Benzina u rrit me tre lekë në tregun e pakicës, duke shkuar nga 175 lekë për litër në 178 lekë për litër. Ndërkohë, me shumicë benzina do të tregtohet 166 lekë. Bordi thotë se çmimet e vendosura këtë të martë do të jenë në fuqi deri në një vendim të ri dhe se niveli tavan i tyre përcaktohet në bazë të luhatjes në bursat ndërkombëtare, ku pas lajmit për dështimin e raundit të parë të negociatave mes SHBA dhe Iranit tregjet reflektuan me rritje çmimin e naftës.
Ndërkohë, me tavanin e ri nuk aplikohet zbritja e akcizës, që sipas aktit normative të qeverisë ulet me 20 për qind vetëm në rastet kur çmimi tavan i naftës i caktuar nga bordi arrin mbi 220 lekë për litër në tregun e pakicës.
