Nga Ramazan Çeka
Çfarë kënaqësie e pafund dhe çfarë emocioni që të pushtonte tërësisht, të ndiqje një performancë kaq magjike në skenën e Festivalit Mbarëkombëtar të Fëmijëve, në edicionin e tij të 64-të, në Tempullin e artit dhe kulturës, në Teatrin “Migjeni”!
Ajri Drishti shkëlqeu si një xhevahir, duke rrëmbyer duartrokitjet e zjarrta dhe Çmimin e Parë në kategorinë e të vegjëlve, me këngën “Nuk kam ku luj”.
Në Shkodrën tonë, në këtë djep të pashtershëm të kulturës dhe artit, netë të tilla shkruajnë histori. Shkodra e këngës dhe e traditës sot krenohet me këtë fitore të bukur, një ngjarje që pasuron vlerat tona dhe që do të kujtohet gjatë si një festë e vërtetë e shpirtit artistik!
Përgëzime nga zemra dyshes së mrekullueshme të realizuesve: Ismet Drishti, për këtë tekst e muzikë kaq goditëse e plot jetë, dhe maestros Ilir Zoga për orkestrimin e përkryer që i dha krahë këtij suksesi. Mjeshtëri e vërtetë!
Rrugëtim të mbarë e plot dritë për artisten tonë të vogël, Ajrin! U rritsh dhe shkëlqefsh gjithmonë mes duartrokitjesh!
