Kreu i PD Lulzim Basha përmes një mesazhi reagon në ditën e shenjtërimit të Nënë Terezës.
Le të jetë dita e shenjtërimit të Nënë Terezës thotë Basha, ditë reflektimi për gjendjen ku ndodhet vendi dhe për çfarë duhet bërë për të lehtësuar sa më shumë jetën e qytetarëve që sot gjenden mes vështirësive dhe pamundësive. Ai publikon dhe videon kur Nënë Tereza u shpall shenjtore në Vatikan.
“Dita e shenjtërimit të Nënë Terezës, simbolit të dashurisë, dhembshurisë dhe kujdesit për të varfërit e të pamundurit, është mbi të gjitha një ditë reflektimi për gjendjen ku ndodhet vendi dhe për çfarë duhet të bëjmë për të lehtësuar sa më shumë jetën e bashkëqytetarëve tanë që sot gjenden mes vështirësive dhe pamundësive.
“Edhe ata që s’mund të bëjnë dot gjëra të mëdha, mund të bëjnë gjëra të vogla me dashuri të madhe.” Kjo thënie e Nënë Terezës le të jetë frymëzim për të nisur së bashku ndryshimin, për të ndërtuar një jetë më të mirë për bashkëqytetarët tanë, me më shumë përkujdesje për të pamundurit, me mundësi për punë e jetë më të mirë për bashkëqytetarët tanë, për ditë më të mira për popullin dhe vendin tonë”, shkruan Lulzim Basha, kreu i Partisë Demokratike.
