Trump ka kërcënuar të mbyllë kufirin SHBA-Meksikë dhe të shkurtojë ndihmën në Amerikën Qendrore, për të ndalur karvanin e disa mijëra njerëzve. Zyrtarët e SH.B.A. kanë thënë se deri në 1000 trupa mund të dërgohen në kufirin jugor të SHBA-ve, për të parandaluar kalimin e migrantëve.
Qeveria e Meksikës ka thënë se më shumë se 1,700 njerëz në konvoj janë regjistruar për azil, ndërsa të tjerët janë kthyer në shtëpi. Vlerësimet për madhësinë e grupit ndryshojnë. Alden Rivera, ambasadori i Hondurasit në Meksikë, i tha radios meksikane se karvani mund të arrinte në Qytetin e Meksikos deri të premten e ardhshme. Ai deklaroi një numër zyrtar prej 3.500 personash, duke vlerësuar se të paktën dy të tretat e tyre ishin hondurianë. Karvani u nis nga Hondurasi pothuajse dy javë më parë dhe ka marrë në këmbë edhe persona të tjerë të Amerikës Qendrore, ndërsa Rivera tha se nuk ishte e qartë se cilën rrugë do të ndiqte në ditët në vijim.
Aleksandër Fernandez, një hondurian që udhëtonte në karvan, tha se njerëzit nisën të largoheshin nga qyteti i Pijijiapan rreth orës 3 të mëngjesit për në Arriaga, një qytet në perëndim të Chiapas. Ai tha se një ndalesë ishte planifikuar në qytetin Tonala. Meksika ka ofruar leje pune të përkohshme për emigrantët nga Hondurasi që do regjistrohen për azil.
Plani parashikon gjithashtu karta të përkohshme ID, kujdes mjekësor dhe shkollim. Por për t’u kualifikuar, emigrantët duhet të qëndrojnë në shtetet jugore të Meksikës.
