Ish-ministri i Drejtësisë, Ylli Manjani ka deklaruar se nga ajo që është zbuluar për inceneratorët është vetëm “maja e ajsbergut”, pasi sipas tij, emra të tjerë në kabinetin qeveritar janë përfshirë në këtë aferë korruptive.
Gjatë një postimi në rrjetet sociale, Manjani thekson se në aferë është përfshirë edhe anëtarja e Komisionit të Vlerësimit të Ofertave Etleva Kondi, ka shkëmbyer mesazhe (e-mail) me bosët e inceneratorëve.
Njëri prej mesazheve është dërguar më datë 26 gusht 2014, në adresë të Klodian Zotos, dhe bëhet fjalë për përmbajtjen e një vendimi të Bashkisë së Elbasanit, për shpalljen e emergjencës mjedisore. SPAK dyshon se në një tjetër mesazh, Kondi i drejtohet Klodian Zotos por dyshohet edhe Mirel Mërtirit, të cilin e thërret ‘Klodër’ pasi më herët ai ka mbajtur emri ‘Klodian’ dhe mesazhi ka këtë përmbajtje.
Kondi është një nga personat e pandehur për llogari të SPAK bashkë me Lefter Kokën, Alqi Bllakon, Klodian Zoton e Mirel Mërtirin, për megaaferën e inceneratorit të Elbasanit.
Reagimi i plotë nga Ylli Manjani:
“Hej, Klodianër…”,
Kështu fillon emaili që ka dalë së fundi në media, ku bashkëpunëtorja e Damian Gjiknurit i del për zot organizimit të gjithë procesit të dhënies me koncension të incenerimit dhe trajtimit të mbetjeve.
Ja pra që nuk na qënka “koka e problemit” te Lefter Koka. Paska patur kokë të tjera që i paskan drejtuar këto punë.
Ky email i nënpunëses është nisur nga emaili zyrtar. Pra s’u ka bërë syri tërt se kanë qenë të bindur se nuk u hyn gjëmb në këmbë.
Xhanëm asgjë s’u ka ndodhur… Të paktën deri tani…
Por ai email tregon shumë. Tregon nga ka nisur problemi. Nga ai email mund të shkohet më lart. Më poshtë ska ku të shkojë më. Nëse SPAK do të shkojë më lart, ja ku e ka shtegun. Tek ai email…
Hë për hë ka vetëm hetime të pjesshme, totalisht të paplota dhe masa sigurie të marra në nxitim për të treguar me zor rezultate.
“Klodër, kini parasysh si vijon: së pari bashkia Elbasan duhet të miratojë këtë në Këshillin Bashkiak (nuk jam e sigurt para apo pas shkresës që do t’ju nisë juve). Së dyti, duhet të krijojë një komision të dhënies së koncesionit, që do t’ia bëjmë gati ne) në ligj parashikohet që mund të marrin ekspertë të fushës që kështu mund të jem edhe unë me ndonjë kolege”.
Përmbajtja e mesazhit ngre dyshime që Etleva Kondi mund të ketë patur dakordësinë e Ministrit që të emërohet në atë detyrë. Emaili daton 4 muaj përpara se sekretari i Përgjithshëm pranë Ministrisë së Energjetikës, Koli Bele, ta propozonte Kondin si anëtare të komisionit të dhënies së koncesionit. E njohur si një person mjaft i afërt me ish-ministrin Damian Gjiknuri, Kondi dërgon një tjetër email në drejtim të Klodian Zotos i cili mban datën 2 nëntor 2014. Ajo i përcjell kontratën koncesionare për inceneratorin, që përbëhet nga 79 fletë, ndërsa përmbajtja është kjo.
“Përshëndetje Klodër! Në draftin bashkangjitur kam bërë një parashikim të përgjithshëm. Selektimet me ngjyra duhen saktësime dhe modifikime të cilat do t’i diskutojmë paraprakisht”.
