Ambasadorja e SHBA Yuri Kim, ka përshëndetur vendimin e sotëm të presidentit Ilir Meta, i cili ka dekretuar emërimin e gjyqtares Arbena Ahmeti si anëtare e 10-të e Gjykatës së Lartë. Sipas Kim, kjo rrit funksionalitetin dhe mundëson që Gjykata e Lartë të emërojë një anëtar në Kushtetuese.
“Mirëpresim bashkëpunimin e vazhdueshëm ndërmjet institucioneve për zbatimin e reformës në drejtësi, përfshirë emërimin e sotëm nga Presidenca të anëtarit të 10-të të Gjykatës së Lartë. Kjo rrit funksionalitetin e Gjykatës së Lartë dhe gjithashtu mundëson që Gjykata e Lartë të emërojë një anëtar në Gjykatën Kushtetuese”, shkruan Ambasadorja.
Kujtojmë se, me emërimin e Arbena Ahmetit, Gjykata e Lartë nga sot bëhet me 10 gjyqtarë, nga 19 që duhet të ketë për të qenë plotësisht funksionale. Ahmeti kishte kaluar me sukses dhe procesin e vettingut dhe emri i saj ju përcoll Metës nga KLGJ-ja.