Në një intervistë të dhënë për VOA, ish-kryetari i KMSH-së, Skënder Bruçaj u shpreh se nëse xhamia e Namazgjasë nuk përfundohet nga turqit deri në verë kur mbaron kontrata, Komiteti Mysliman i Shqipërisë i ka forcat që ta përundojë i vetëm këtë objekt kulti.
Bruçaj thekson se xhamia duhet të përfundonte brenda dy vitesh, ndërsa shton se ajo nuk bëhet me fondet e qeverisë turke por me ndihmesën e vëllezërve myslimanë në Turqi.
Pyetje: Punimet për xhaminë e Namazgjasë janë ndërprerë, a është kjo një formë presioni që Ankaraja po ushtron mbi KMSH-në?
Bruçaj: Fillimet e punimeve ishin atëherë kur isha unë në detyrë kryetar i KMSH. Në një vizitë që pata në Turqi, i pata thënë ish-kryetarit të Komunitetit Mysliman të Turqisë që duhet të filloni punimet e xhamisë së Namazgjasë se edhe unë për vete kam kontribuar. Ose më ktheni paratë mbrapsht ose filloni punimet.
Ka 7 vjet që vazhdon dhe nuk mbaron. Besoj se kontrata këtë verë mbaron. Nëse ata nuk e mbarojnë, KMSH i ka forcat për ta mbaruar. Xhamia është një objekt kulti, nuk mund të bëhet pjesë e një pazari politik, e as e një strategjie kombëtare të një shteti të huaj për të rritur influencën e vet.
Është një objekt i lutjes së Zotit dhe më vjen keq që është bërë pjesë e këtyre polemikave,” tha ish-kreu i KMSH.
© Panorama.al
