Kompania e Pëllumb Salillarit ka fituar tenderin miliona euro për restaurimin e Kalasë së Ali Pashës në Tepelenë.
Është Fondi Shqiptar i Zhvillimit që i ka vendosur biznesmenit, i cili vetëm pak ditë më parë u kap me pallat pa leje në mes të Tiranës, plot 5.4 miliardë lekë të vjetra. Ajo që e bën qesharake këtë situatë, është se Fondi Shqiptar i Zhvillimit ka arritur në konkluzionin se llaçi i përdorur 200 vite më parë për ndërtimin e kalasë ka qenë jo cilësor.
“Gjendja e monumentit nuk është e mirë, pasi materiali lidhës i gurëve, llaçi i gëlqeres nuk ka qenë i cilësisë së lartë në kohën e ndërtimit. Një nga arsyet e kësaj dobësie është dhe puna e nxituar që shoqëroi ndërtimin e këtyre fortesave. Kjo dukuri vihet re më qartë në ndërtimet e brendshme ku muratura e tyre është shkërmoqur dhe është në degradim të vazhdueshëm”, thuhet në dokumentat e tenderit.
Vetëm pak ditë më parë, Salillari arriti të fitojë, pa garë, një tjetër tender prej 2.5 milionë eurosh për thellimin e basenit të Triportit në Vlorë.
