Këshilli i Qarkut të Kukësit ka nderuar tre figura të shquara, ku dy prej tyre janë mjeku Shaqir Shehu dhe biologu Besnik Hallaçi të cilët nëntorin e kaluar humbën jetën nga Covid-19.
Tre personalitetet kuksiane u shpallën sot ‘Nderi i Qarkut Kukës’ ku përveç mjekut dhe biologut ky titull i’u dha dhe kreut të Komunitetit Mysliman, Bujar Spahiu, për kontributin e tij të gjerë. Në ceremoni, kanë marrë pjesë autoritetet lokale të Qarkut Kukës, Perfekti i Qarkut, Zenel Kuçana, Kryetari i Bashkisë, Safet Gjici dhe zyrtarë të tjerë.
Kryebashkiaku, Gjici u shpreh se tre personalitetet kanë lënë gjurmë të thella në historinë e vendit dhe rajonit tonë.
“I lumtur që sot bashkë me kryetarin e Këshillit të Qarkut Z. Abdulla Domi, prefektin e qarkut Z.Zenel Kuçana i dorëzuam titullin “Nderi i Qarkut Kukës” të doktor Shaqir Shehut, Besnik Hallaçit dhe Bujar Spahiut. E quaj për nder sot, që në pozicionin e kryetarit të Bashkisë Kukës të flas dhe të nderoj figurat e shquara të inteligjencës Kuksiane, të cilët kanë lënë gjurmë të thella në historinë dhe jetën e rajonit tone”, tha ai.
Kujtojmë se mjeku Shaqir Shehu shërbente si kirurg ortoped në qytetin e Kukësit për shumë vite, ndërsa pas infektimit me COVID-19 u dërgua për kurim në Turqi, por nuk ia doli mbanë. Mësohet se ai ka shërbyer dhe gjatë luftës së Kosovës teksa Bashkia e Kukësit e ka shpallur edhe ”Qytetar Nderi” dhe për 3 vite nga 2002-2005 ai ka punuar edhe si prefekti i qarkut të Kukësit.
