Ministri i Brendshëm Saimir Tahiri priti sot në takim homologun austriak Wolfgang Sobotka.
Në konferencën e përbashkët, Tahiri vlerësoi bashkëpunimin mes dy vendeve, veçanërisht në luftën kundër krimit të organizuar, terrorizmit, korrupsionit dhe në luftën kundër trafikimit të lëndëve narkotike.
Ai tha më tej se ka patur një bashkëpunim të shkëlqyer dhe për sa i përket reformimit të Policisë së Shtetit dhe shkëmbimit të praktikave më të mira.
“Rruga e Shqipërisë është integrimi në Bashkimin Europian dhe lufta kundër krimit të organizuar, kundër korrupsionit, kundër terrorizmit, kundër trafikimit të drogës. Janë gur të rëndësishëm kilometrik në këtë kuadër. Ndaj bashkëpunimi i deritanishëm dhe ajo që kemi për të bërë në të ardhmen është një ndihmë e vyer në këtë proces”, u shpreh Tahiri.
Nga ana e tij, Sobotka tha se Shqipëria është për ne një partner i rëndësishëm në Ballkan, një partner strategjik dhe operativ.
Sipas tij, Bashkimi Europian e do Shqipërinë në mesin e tij dhe Austria në këtë rast është një faktor dhe një vend i cili e mbështet fuqishëm.
“Para ardhjes sime këtu zhvillova një telefonatë me komisionerin Hahn, ku ne theksuam edhe një herë që viti 2017 është një vit i rëndësishëm për Shqipërinë, por për këtë duhet të kapërcejë edhe sfidat që i kanë mbetur. Në mënyrë që në 2017 të arrijë të marrë një përgjigje pozitive për çeljen e negociatave të pritura”, u shpreh ai.
Në vijim shtoi se Shqipëria ka ndërmarrë iniciativa të mëdha për të luftuar krimin e organizuar, trafikun e armëve por mbi të gjitha për të luftuar trafikun e lëndëve narkotike.
Ai e përgëzoi Tahirin për rezultatet e arritura në luftën kundër trafikut të narkotikëve.
Sipas tij, Shqipëria është në rrugën e duhur për sa i përket një sistemi modern të kontrollit të kufijve.
