Kreu i lëvizjes “Shqipëria Bëhet”, Adriatik Lapaj, është shprehur se kryeministri Edi Rama i ka ofruar poste qeveritare gjatë muajve qershor dhe korrik të këtij viti.
Në një intervistë për emisionin “Zonë e Lirë”, Lapaj tha se Rama e ka kontaktuar personalisht për t’i propozuar fillimisht postin e zëvendëskryeministrit, ndërsa më pas edhe atë të ministrit të Bujqësisë.
“Ka pasur dy momente. I pari në fund të muajit qershor dhe i dyti në javën e dytë të korrikut. Në qershor më propozuan të bëhesha zëvendëskryeministër, ndërsa në korrik ministër i Bujqësisë”, tha Lapaj.
Ai theksoi se e ka refuzuar ofertën, duke u shprehur se nuk do të pranonte kurrë të bëhej pjesë e qeverisë Rama, pasi e konsideron veten kundërshtar të sistemit aktual politik.
“Si një njeri antisistem dhe si dikush në opozitë me Edi Ramën, nuk do të shkoja kurrë në qeveri me të. Koha i çon të gjitha në vend”, shtoi Lapaj.
