Mustafa Nano duke komentuar qeverinë e re, tha që kryeministri Edi Rama është sot një lider absolut në Shqipëri, sidomos brenda mazhorancës socialiste.

Sipas Nanos, ministrja që do të operojë me inteligjencë artificiale, Diella, është një gjetje interesante, që i shkon epokës “High Tecnology”, në të cilën jetojmë, “por unë nuk kam kompetencën për ta vlerësuar si gjetje”. “Duhet të presim për të parë sa funksionale do të rezultojë”.

“Ministrja më e veçantë është Diella. Zgjedhjet e tjera s’më befasuan, janë zgjedhje brenda stilit të Ramës.

Ka zgjedhur sërish kryesisht gra, sepse sipas tij me gratë punohet më mirë, gjë që unë s’e di sa e vërtetë është.

Në terma të CV-së dhe përgatitjes akademike, apo karrierave që kanë, s’më duken keq, sidomos disa që janë edhe fytyra të reja. Por nuk është se ka ndonjë rëndësi të madhe.

Ministrat kanë rëndësi kur ata kanë autonomi për të vepruar, e për të treguar se sa vlejnë, dhe ky nuk është rasti i ministrave të Ramës.

Kush pranon të bëhet pjesë e kabinetit “Rama” e ka futur me siguri në llogari që do jenë vartës të Ramës, dhe aq.

Edi Rama është lider absolut, që delegon pushtet ose te të besuarit e vet, ose te Diella. Të tjerët do të jenë numërorë topi.

Po ju jap një provë për këtë. Kur kryeministri po njoftonte emrat e kabinetit asnjëri prej atyre s’dinte gjë. Të gjithë po bënin reagime spontane e po shihnin njëri-tjetrin.

Më shokoi ajo skenë. Sepse është absurde. Njeriu duhet ta dijë se ku do ta emërojnë, sepse ndoshta mund të ketë arsye ta refuzojë një post të caktuar.

Edhe nëse nuk e refuzon, robi ka nevojë të dijë kohë përpara, në mënyrë që të përgatitet, të vrasë mendjen, të planifikojë risitë, nismat, reformat.

Nëse kjo nuk ndodh, atëherë i bie që nuk ka pse ta vrasin mendjen, pasi e vret tjetërkush. E vret mendjen Rama për ta.

Ky është një pushtet i frikshëm. I frikshëm në radhë të parë për Ramën. Unë vetë do isha çmendur po të kisha një pushtet të tillë”, tha ai për MCN.

Duke folur mbi Diellën, që do të jetë në krye të prokurimeve publike, Nano shton:

“Në terma teknikë s’e marr vesh. Si gjetje rezultoi që të ishte interesante dhe spektakolare, sepse gjeti jehonë kudo, edhe në mediat e botës. Dhe nuk u pa me dyshim. Përkundrazi, u vlerësua.

Por duhet parë, do na duhet të paktën një vit kohë për të parë nëse është një gjë që funksionon. S’është çudi që të ketë një lloj suksesi dhe të rezultojë edhe një shpikje që mund të hapë rrugën e të hyjë kështu në librat e historisë. Por duhet të presim”.

Nano nuk mendon që Veliaj ka dalë nga skena politike dhe sipas tij rol do të luajë fakti nëse kryebashkiaku do të dënohet apo jo.

“Veliaj s’ka dalë nga skena, është në një proces gjyqësor, sepse këtu në Shqipëri e kanë provuar që s’dalin kollaj nga skena, jo vetëm në Shqipëri.

Politikanët kanë 7 shpirtra. Duhet parë gjyqi, nëse dënohet shanset për t’u rikthyer janë thuajse zero. Por nëse s’dënohet del me kredenciale të forta.

Lidhur me Manastirliun, më duhet të them se s’e njoh mirë, s’e kam ndjekur mirë aktivitetin e saj.

Nuk e kam parë ta akuzojnë, e kështu letrat “morale” duket se i ka në rregull.

Ndërsa kompetencën në lëmin e administrimit të pushtetit apo të një sektori të veçantë nuk ia njoh.

Opozitës në Tiranë nuk i jap asnjë shans, pavarësisht nga emri. Opozitën e shoh të mbaruar. Dhe nuk shoh asnjë shenjë se gjërat mund të ndreqen.”

Partia Socialiste mblodhi sot grupin parlamentar, pak ditë pas betimit të deputetëve në Kuvend.

I pranishëm në këtë mbledhje ishte edhe kryeministri Edi Rama.

Fokusi i mbledhjes ishte ndryshimi i rregullores së Parlamentit për riorganizimin e komisionet parlamentare.

Pjesë e diskutimeve ishin edhe seancat plenare të njëpasnjëshme që parashikohen ketë javë.

Burimet thanë se Damian Gjiknuri është konfirmuar sërish në krye të Komisionit të Reformës Zgjedhore, ndërsa Blendi Klosi do të drejtojë komisionin e përhershëm parlamentar të Bujqësisë, Ushqimit dhe Zhvillimit Rural.

Gjatë mbledhjes së fundit të Asamblesë, kryeministri Rama bëri të ditur se komisionet e përhershme parlamentare nuk do të jenë më 8 si në legjislaturën e fundit, por 11. Nga këto shtatë do të drejtohen nga maxhorabca dhe katër nga opozita.

1-Komisioni për Ekonominë Punësimin dhe Financat – drejton maxhoranca Milva Ekonomi

2-Komisioni për çështjet Ligjore dhe Administratën Publike – drejton maxhoranca Ulsi Manja

3-Komisioni për çështjet e Brendshme dhe Mbrojtjen- drejton maxhoranca Bledi Cuci

4-Komisioni për Edukimin, Shkencën dhe Sportet – drejton opozita

5-Komisioni për Shëndetësinë dhe Mirëqenien Sociale – drejtohet nga opozita

6-Komisioni për Burimet Natyrore, Infrastrukturën dhe Zhvillimin e Qendrueshëm – Drejtohet nga maxhornca Anila Denaj

7-Komisioni për të Drejtat e Njeriut dhe Mjetet e Informimit Publik – Drejton Opozita

8-Komisioni për Bujqësine, Ushqimin dhe Zhvillimin Rura – drejton maxhoranca Blendi Klosi

9-Komisioni për Kulturën, Turizmin dhe Diasporën – Drejton opozita

10-Komisioni për Europën dhe Punët e Jatshme – Drejton maxhoranca Igli Hasani

11-Komisioni i ri për Nismat Qytetare, Bashkëpunimin dhe Mbikëqyrjen Institucionale – drejton maxhiranca Fatmir Xhafaj

Komisioni i Posaçem për Reformën Zgjedhore – Damian Gjiknuri

Komisioni i Posaçëm për Reformëm Administrative-Territoriale – Arbian Mazniku

Profesor Pëllumb Pilinçi mohon të jetë qeveri hije, duke i quajtur ato fjalë njerëzish. Në një mesazh të shpërndarë, profesori i njohur shprehet se ai e ka bërë qeverinë e tij dhe pret njerëzit të vejë në zyra, por jo në këto zyrat që janë aktualisht, sepse ai premton që t’i lyejë dhe pastrojë ato me allçi.

Gjatë bisedës së tij profesor Pilinçi shprehet se ka ardhur për njerëzit dhe jo për vete, pavarësisht se ka fëmijë dhe nipër që do t’i shijojë, por po e bënë këtë sakrificë, sepse shqiptarët rrinë në kafe dhe bëjnë llogje.

“Unë për ju jam, nuk jam për veten time. Për veten time po humbas kohë. Edhe unë kam fëmijë, edhe unë dua të shijoj fëmijët e mi, nipërit e mi dua edhe unë t’i shijoj, që nuk po i shijoj dot. Përse? Kam erdh për ju. Për ju që keni vetëm llafe nëpër kafene, vetëm mashtrime. Të gjithë televizionet që kanë dalë bëjnë llogje dhe ju qeshni”, thotë kryetari i vetëshpallur i qeverisë jo ‘hije’, profesor Pëllumb Pilinçi.

Gjatë kësaj video ai ka hedhur edhe akuza të rënda për qeverinë e re, duke thënë se 8 prej ministrave janë agjentë të grekut.

Më tej ai zotohet që ta bëjë Shqipërinë në kufijtë natyror dhe thotë se e ka shpallur qeverinë, sipas tij jo hije, dhe pret vetëm të vijnë njerëzit dhe të futet në zyrë.

“Pilinçi do të bëjë Shqipërinë me kufij natyror. Unë tre orë që fle e kam mendjen në amanetet që kam. Amanetet që kam i mbarova, do bëhet qeveria. E bëmë dhe lëre se ç’thonë njerëzit, jo në hije. Pilinçi e ka bërë qeverinë. Unë pres njerëzit për të dalë ku janë zyrat, por jo në këto zyra që janë. Këto që janë do t’i bëj me allçi, do t’i pastroj që nga ’44-tërta dhe deri në momentin që flasim”, u shpreh Pilinçi.

Nga Armir Shkurti

S’ka aktor e regjisor shqiptar që s’e njeh këtë histori emblematike të mjeshtrit Piro Mani!

Në kohën e Enverit, para se një pjesë ti shfaqej publikut, kqyrej me lente nga një komision hibrid politiko artistik. Piro kishte vendosur në dekor një rrotë qerreje, e cila s’kishte hiç lidhje as me formën as ne përmbajtjen e dramës. Pasi komisioni pa gjithë pjesën u mblodh me diskutu për vërejtjet dhe sugjerimet e rastit.

– Mirë mo mirë ishte shfaqja, po ajo rrota e qerres sikur s’shkonte aty… – u shpreh i pari

– Po pse mo, mirë është! Tregon lidhjen me fshatin….

Vazhdoi sa të duash mbledhja! Folën e stërfolën të gjithë, por jo për pjesë: folën për rrotën. Në fund i sugjeruan regjisorit se është më e udhës që ta heqë fare. Piro pranoi pa hezitim ta zhdukë rrotën nga dekori dhe mbledhja u mbyll, duke i dhënë miratimin pa diskutim shfaqjes për publikun.

Kur dolën jashtë, njëri nga anëtarët e komisionit, në konfidencë, i thotë:

– Po mirë mo Piro, po a s’më thua pse e vure atë rrotë qerreje ?

– Që të merreshit – siç u morët – vetëm me të e të mos më çanit bythën për pjesën!

“Diella” e Edi Ramës nuk ka hiç ndryshim nga rrota e Piros! Ka që të enjten populli dhe mediat që merren me Diellën ndërkohë që pjesa me 18 “Diella” kaloi pa koment fare.

Po pse mo, nga ndryshojnë Elisa, Adea, Mirela, Blendi e kompani nga Diella? Diella është një aplikacion i programuar nga specialistë të IT dhe AI, siç 17 kolegët e saj janë programuar, drejtohen dhe kontrollohen nga një “specialist” i vetëm: Rama.

Nga Andi Bushati

Ndërkohë që shumica e kastës socialiste prisnin me ankth dhe zemërdridhje mësimin e emrave të të preferuarve të Ramës në qeverinë e re, kryeministri i ka surprizuar të gjithë duke krijuar një lajm më të madh: fundin e Erion Veliajt.

Duke u shtirur si zemërthyer nga vendimet e padrejta të drejësisë, duke përmendur sa për të larë gojën izolimin pa dënim të kryebashkiakut të zgjedhur tre herë, Rama ka shpallur përfundimin e mandait të tij.

Për këdo që i ka pasur sytë hapur, kjo që ngjau sot, mund të përbëjë një surprizë për kohën se kur ndodhi, por jo për fatin e paracaktuar. Prej kohësh Veliaj po trajtohej si lebroz nga shefi i tij. Ministria e drejtësisië e ka privuar atë nga të drejtat si i burgosur i zakonshëm, njerëzit e tij u shkarkuan nga bashkia, mbështetësit e tij u përjashtuan nga grupi i ri parlamentar i PS.

Pra tani, kur Rama shpalli se Këshilli Bashkiak do të fillojë procedurat për shkarkimin e kryebashkiakut të burgosur, madje kur shkoi edhe më larg, kur paratha ndryshime ligjore për të bërë të mundur këtë shkarkim, nuk ka më dyshime se në rastin më të mirë (pra edhe nëse s’duam të besojmë se e ka urdhëruar vetë) ai ka qenë i sinkronizuar me SPAK-un në goditjen ndaj Veliajt.

Në këtë kuptim, hedhja e Lalit si limon i shtrydhur, pikërisht në ditën emërtimit të ekipit Rama 4, tregon shumë për ata që po marrin detyrat e reja sot. Për një pjesë ministrash që ndryshuan dikaster, por sidomos për gjashtë rishtarët e kabinetit, nuk ka asnjë pikë reference se si duhet të sillen për të pasur fat në të ardhmen e tyre. Besfort Lamallari tek drejtësia, Evis Sala tek shëndetësia, Sofian Jaupaj tek mjedisi, Ervin Demo tek pushteti lokal, Toni Gogu tek marëdhëniet me parlamentin dhe Andis Salla tek bujqësia, nuk kanë asnjë eksperiencë ku të mbështeten. Rasti i Erion Veliajt i lë ata pa busull.

Kryebashkiaku i burgosur konsiderohet ende si shembull suksesi nga partia e tij. Ai qëndron në memorie si njeriu që i mundi kundërshtarët tre herë në zgjedhje, që transformoi e modernizoi Tiranën, që pati mbështetjen më të madhe që ka pasur ndonjë politikan në mjediset artistiko sportive të kryeqytetit.

Nga ana tjetër ai diti të tregohej servili par excellence i shefit. Edhe duke ulur kokën për të pranuar urdhra për të bojatisur muret e shkallëve, apo për të ndjekur nga pas lopën e një fshatari, ai nuk thoshte kurrë jo. Nuk e bënte këtë as kur, kundër dëshirës së tij, merrte përsipër kostot e shembjes së teatrit të dëshëruar nga shefi apo kur, ndonëse nuk kishte lidhje, përzihej me zgjedhjet në federatën e futbollit.

Por as suksesi sipas parametrave rilindas, as aftësia prej bythëlëpirësi ndaj të madhit, nuk e shpëtoi atë nga rokullisja më dramatike që ndonjë politikan i këtyre tre dekadave ka pësuar ndonjëherë.

Atëherë duke parë këtë fat tragjik, epilogu i të cilit u shkrua pikërisht në ditën e emërimit të tyre të parë, ç’duhet të mendojnë ministrat e rinj ? Kush e përcakton fatin dhe të ardhmen e tyre politike? A ka më rëndësi puna, bindja e verbër, apo edhe këto sëbashku, mund të zerohen papritmas, thjeshtë për teka apo kalkulime perverse të kryeministrit ?

Natyrisht nuk ka dyshim se ashtu si Veliaj, ministrat rishtarë do të kenë mundësi të vënë dhjamë, të pasurohen shpejt, të krijojnë privilegje për veten dhe rrethin e tyre, por përpos kësaj ata nuk do të kenë asgjë më tepër në dorë. Për ta nuk do të ketë asnjë njësi matëse për të krahasur suksesin apo dështimin dhe mbi të gjitha kohën kur do të ikin apo do të bëhen “koka turku”. Prandaj në këtë rast, në vend të urimit është mirë tu thuhet: mirësehytë në aventurën e atij që pranon me ndërgjegjie që mos e ketë më veten në dorë. Ky është steriotipi i një antari tipik të kabinetit Rama 4.

/Lapsi.al