Ish-zv/kryeministrja dhe ish-ministrja e Infrastrukturës dhe Energjisë, Belinda Balluku reagoi për herë të parë në lidhje me akuzat nga SPAK. Ajo tha se ka vendosur të heshtë pasi beson se çështjet juridike duhet të kenë rrjedhën që i parashikon ligji.

Balluku tha se nuk ka pasur kurrë lidhje me korrupsionin dhe deklaroi se nuk e ka penguar kurrë drejtësinë. Përkundrazi ajo theksoi se nxit prokurorinë që të hetojë për të nxjerrë në sipërfaqe të vërtetën.

“Do desha të thosha shkurt për herë të parë disa fjalë për atë që ka ndodhur dhe atë që është thënë në muajt e fundit. Kam marrë vendim personal me vullnet të lirë që të hesht për një çështje juridike pasi besoj se çdo çështje juridike nuk zgjidhet as në mediat sociale, as në banaqet mediatike, por duhet të ketë rrjedhën e saj siç e parashikon ligji. Kam vendosur ndryshe nga shumë të tjerë të mos analizoj, të mos shaj, anatemoj dhe të jem konsistente, në qëndrimin tim sa i përket drejtësisë. Nëse do i ktheheni deklaratave të mia publike nuk do gjeni asnjë deklaratë të kundërshtojë tjetrën. Besoj që drejtësia duhet të jetë e lirë dhe e pavarur. Drejtësia e re si produkt i reformës në drejtësi, si produkt i vizionit të Edi Ramës dhe PS, si produkt i një Shqipërie europiane duhet të vazhdojë të jetë frymëzimi i këtij vendi pasi u krye për t’i kthyer besimin qytetarëve te një drejtësi e drejtë dhe e pavarur.

Nuk do më dëgjoni kurrë as ta lëvdoj kur godet kundërshtarët e mi politikë, as ta anatemoj kur kjo drejtësi mund të prekë interesat e mi personalë. Nuk do më dëgjoni të përmend prokurorë e gjyqtarë dhe secili duhet të jetë i lirë për të vendosur dhe gjykuar pa qenë i ndikuar nga gjyqet publike, nga gjysmë të vërtetat, nga të pavërtetat apo gënjeshtrat. Nuk kam pasur kurrë lidhje me korrupsionin dhe nxis që hetimi që ka nisur prej muajsh dhe që nuk e kam penguar kurrë as në pozicionin tim si ministre apo zv/kryeministre të vijojë për të nxjerrë të vërtetën në sipërfaqe. Nuk kam as 300, as 20 dhe as 3 apartamente. Nuk kam as jahte, as limuzina, as helikopterë as avionë.

Të gjitha këto janë pjesë e një gjyqi publik, që bëhet me lehtësinë më të madhe në këtë vend, por për të thënë të drejtën unë jam rritur me gjyqet publike dhe ndoshta kurrizi ma mban më mirë se kujtdo tjetër gjyqin publik pasi jam trajnuar dhe kalitur që e vogël. Unë di të bëj punën time. Secili ka mënyrën e tij, jam munduar të bëj më të mirën. Por as nuk e kam penguar drejtësinë dhe as nuk do ta pengoj kurrë drejtësinë tek e cila besoj dhe e kam mbështetur si një pjesë integrale e një Shqipërie europiane”, tha Balluku.

Deputetja e Partisë Demokratike, Albana Vokshi ka reaguar pas situatës së krijuar një ditë më parë në Parlament, ku kryetari i grupit parlamentar të PS, Taulant Balla përdori gjuhë ofenduese ndaj saj, duke i thënë “për ty Albana kam numrin 0900”.

Sipas Vokshit, gjuha që u përdor ndaj saj ishte seksiste, ndërsa u shpreh se u ndje e lënduar.

Gjatë mbledhjes së Komisionit për Evropën dhe Punët e Jashtme, ajo deklaroi se ishte një shenjestrim i qëllimshëm politike për të tentuar sulmon ndaj opozitës dhe ndaj grave deputete të opozitës.

“Dhuna verbale, psikologjike nuk ka vend në parlament. Nuk jam ndjerë e fyer nga ajo që u tha dje nga kryetari i grupit tuaj parlamentar,  sepse njerëz me veprime si të tij e turpërojnë parlamentin por jam ndjerë e lënduar për mënyrën si kryetari i Kuvendit e menaxhoi situatën.

Për mendimin tim e menaxhoi në mënyrë të turpshme dhe me mos distancimin nga ana e grave deputete socialiste për atë që u tha në foltore, për gjuhën seksiste që u përdor nga kryetari i grupit parlamentar të PS.

Unë kam bindjen se shenjëstrimi ishte politik, nuk ishte i rastësishëm. Shenjestrimi ishte i qëllimshëm, po tentojnë të godasin opozitën dhe gratë deputete të opozitës”, tha Albana Vokshi në Komisioni i Jashtëm.

Teksa u shpreh se ndjesa e Taulant Ballës ishte “fake”, madje duke përdorur edhe Bashkimin Evropian, Vokshi iu drejtua socialsitëve, duke i thënë se “modeli që ju i jepni grave shqiptarë është ai i Belinda Ballukut”.

“Përdori edhe BE për një ndjesë fake, mashtrim. Më kanë kërcënuar dhe shandazhuar mua dhe koleget e mia. Më kanë dërguar në SPAK mua dhe familjen time. Më kanë përjashtuar tre muaj së fundmi duke më hequr të drejtën e përfaqësimit, pse? Sepse kërkova heqjen e imunitetit të Belinda Ballukut, sepse ajo është modeli i grave që i jepni ju qytetarëve”, deklaroi Vokshi.

Kreu i lëvizjes “Shqipëria Bëhet” Adriatik Lapaj, ka deklaruar se, partia që ai drejton nuk e njeh drejtuesin e institucionit të Avokatit të Popullit, Endri Shabani.

Nga protesta përballë Kryeministrisë, ai u shpreh se Shabani nuk ka legjitimitet moral dhe është sipas tij rezultat i një pazari të shëmtuar.

“Ne nuk e njohim si institucion, drejtimin e institucionit, jo institucionin në vetvete, nuk e njohim drejtuesin e atij institucioni si të ligjshëm, sepse nuk plotëson kriteret e ligjit për Avokatin e Popullit, që nga vjetërsia në profesion, ushtrimi i profesionit, e me radhë, e me radhë, janë shumë pika. Nga ana tjetër nuk la legjitimitet moral, sepse është rezultat i një pazari të shëmtuar, që ka synuar dhe po synon tërë kohës, përmes regjisorit Edi Rama, të vrasë besimin e popullit, besimin e rinisë që këtu mund të ketë ndryshim”, tha Lapaj në një intervistë për emisionin “Dita Jonë” në A2CNN.

Lapaj e konsideroi Endri Shabanin si modelin më të pistë dhe më të keq që mund t’i ofrohet rinisë. Sipas Lapajt një shoqëri s’e vret vetëm krimi i organizuar, por mungesa e moralit.

“Duke dhënë modelin që të gjithë shiten, të gjithë e bëjnë për një vend pune, të gjithë e bëjnë për një post, ai është modeli më i keq, më i pistë që mund t’i ofrohet rinisë. Një shoqëri s’e vret vetëm krimi i organizuar, por një shoqëri fillimisht e vret mungesa e moralit. Morali në politikë, morali në shoqëri, morali në administratë, morali në jetë, imponon pastaj një sjellje tjetër të shoqërisë. Vrasja e moralit në politik, vrasja e moralit në jetën publike, është po aq e rrezikshme sa krimi i organizuar”, tha Lapaj.

Kujtojmë që prej afro 3 muajsh Adriatik Lapaj dhe aktivistë të tjerë të “Shqipëria Bëhet” po protestojnë para Kryeministrisë.

Gazetari Neritan Sejamini shprehu bindjen e tij se protestat e opozitës japin “zero rezultat”.

“Opozita nuk mund të thotë që nuk bën dot asgjë derisa të ketë zgjedhje të ndershme. Nuk ka pikë dyshimi që të gjitha zgjedhjet në të cilat do marri pjesë opozita derisa të vijë në pushtet do jenë pak a shumë të pandershme, do jenë pak a shumë të manipuluara nga pushteti dhe detyra e opozitës është si do ta përballojë këtë vështirësi? Si opozita do ta kapërcejë këtë gjë? Dhe këtu ka dy mënyra. Ose do marrësh aq shumë vota sa nuk ka rëndësi se do të marrë e do të vjedhë kundërshtari, ose do zgjosh pakënaqësi sot, pakënaqësi popullore që njerëzit të çohen. Por, unë një gjë e them me siguri të plotë: Protestat që bën opozita e kanë rezultatin zero”, tha Sejamini.

Sipas tij, “opozita ngatërron godinën me pushtetin”.

“Pushteti nuk është godina. Ti hy në Kyeministri po deshe, edhe deri te zyra e kryeministrit. S’domethënë që ke marrë pushtetin. Ti qëlloje me fishekzjarre, qëlloje me çfarë të duash ti. Ai nuk është pushteti. Pushteti nuk është godina. Pushteti janë institucionet dhe ata që e ushtrojnë këtë lloj pushteti. Pra, ti mund të hysh, mund ta godasësh godinën e Kryeministrisë, mund të bësh protestë aty përditë, ndërkohë që zoti Rama është duke ngrënë darkë diku tjetër dhe duke u argëtuar me paratë tona apo duke bërë pazare se kujt do i japi tenderin tjetër të fotovoltaikëve apo portit tjetër të Durrësit. Prandaj, opozita duhet që energjitë e veta t’i kontrollojë, të ketë një plan afatgjatë dhe të kuptojë vështirësitë e detyrës së vet dhe të ngrihet në lartësinë e detyrës së vet”, theksoi Sejamini në “Off the Record” në A2CNN.