Kryetari i partisë ‘Zgjidhja”, Koço Kokëdhima, i dërgoi sot një letër ambasadorit të SHBA-ve në Tiranë, z.Donald Lu. Sipas një deklarate për shtyp të Zyrës së shtypit të Partisë “Zgjidhja”, në këtë letër Kokëdhima e informon ambasadorin amerikan për zhvillimet dhe aktivitetin politik të partisë “Zgjidhja” dhe i parashtron disa kundërshtime dhe kërkesa rreth rolit të tij si kryediplomat i SHBA-ve në Tiranë.
Nuk jepen hollësi për përmbajtjen e letrës, por mendohet se ajo ka lidhje me deklaratën e pak ditëve më parë, kur ambasadori Lu, gjatë një takimi të shoqërisë civile, përmendi edhe emrin e kreut të “Zgjidhja”, mes ish-zyrtarëve dhe ish-deputetëve që u larguan nga detyra si rezultat i funksionimit të ligjit të dekriminalizimit dhe punës së gazetarëve kurajozë. Kjo është hera e dytë që ambasadori Lu adreson akuza ndaj ish-deputetit Kokëdhima. Në 4 nëntor 2016, pas akuzave të tilla, Kokëdhima, përmes një deklarate publike, akuzoi diplomatin përfaqësues të Uashingtonit se me deklaratën e tij duke e akuzuar si të korruptuar ka nëpërkëmbur etikën diplomatike. “Me deklaratën e tij ambasadori Donald Lu nëpërkëmbi etikën diplomatike. E bëri pa provë pa asnjë fakt. Gjithë jetën kam punuar në biznesin tim dhe mediat që kam drejtuar janë ndeshur me qeveritë e korruptuara. Kam paguar kostot e kësaj lufte. Kam qëndruar gjithmonë në anën e qytetarëve. Pasuritë i kam bërë me biznesmenë të ndershëm. Erdha në politikë i pasur për të punuar për vendin dhe për një karrierë të shëndetshme. Shumë të tjerë hynë në politikë të varfër dhe u pasuruan. Deklaratat e ambasadorit janë të pavërteta. Janë të ndikuar nga ata njerëz që goditën mandatin tim në Gjykatën Kushtetuese dhe nga ata njerëz e intriga që nxijnë sa një ambasadë në ambasadën tjetër. Intrigat dhe politikanët e ulët të Tiranës nuk mund të vendosin për mua në politikë e bëjnë vetëm qytetarët”, deklaronte Kokëdhima më 4 nëntor 2016.

Prokuroria e Tiranës ka zbuluar një skemë të mirëfilltë të pastrimit të parave, kësaj radhe nga dy shtetas norvegjezë, të cilët zgjodhën Shqipërinë për të pastruar mbi 800 mijë euro, që dyshohen se janë krijuar nga skema mashtrimi. Ove Johanson dhe Joo Borgen Nilsen, janë dy norvegjezët, të cilet tentuan që nëpërmjet hapjes së firmave fantazëm në vendin tonë dhe shitblerjes së aksioneve, të justifikonin qindra mijëra euro që i kanë siguruar nga aktiviteti kriminal. Nga hetimet e kryera ka rezultuar se shoqëria “Norwegian Golf Devlopment AS”, e regjistruar në Novergji, ka shitur aksionet e saj në vendin tonë për një vlerë prej 2850 euro. Blerësi kryesor i këtyre aksioneve me 90 për qind është Ove Johanson. Dy muaj pas kësaj kontrate, Johanson i shet të bashkëpandehurit të tij Joo Borgen Nilsen 40 për qind të aksioneve të firmës për një vlerë prej 600 mijë euro. Pra një cmim 500 herë më i madh se vlera e blerjes në një kohë që në shoqëri nuk ishte bërë asnjë investim. Nag ana tjetër norvegjezi Nilsen, regjistroi në vendin tonë shoqerine me emrin “Asia Capital Group” me object veprimatrie, ndërtime, projektime dhe zbatime të projekteve inxhinierike. Me anë të këtyre kamuflimeve norvegjezët sollën në vend disa llogari bankare nga Filipinet, vlera e të cilave është 600 mijë euro. Kjo shifër është sekuestruar nga prokuroria, e cila përveç transaksioneve të dyshimta të blerjes së aksioneve shumë lirë dhe shitjes me një vlerë 500 fish më të lartë, ka mbledhur informacion se dy norvegjezët janë të kërkuar dhe dënuar edhe në vende të tjera të rajonit. Ove Johanson rezulton i dënuar në Kosovë për një mashtrim me 300 mijë euro. Ndërsa Joo Borgen Nilsen rezulton pjesë e skemave piramidale në Norvegji e njohur si Unaico. Të dy të pandehurit norvegjezë janë dërguar së fundmi për gjykim në mungesë në gjykatën e Tiranës, pasi janë larguar jashtë Shqipërisë.

Në ditën e fundit kur trupës policore po i skadon afati i dorëzimit të formularëve të vettingut, rezulton 11.700 efektivë e kanë përmbushur këtë detyrim ligjor. Policët kanë kohë deri në orën 24.00 të ditës së sotme, ndërkohë që shumica më e madhe prej tyre e kanë realizuar procedurën deri në mesditën e të hënës. Deri mesditën e së hënës, dita e fundit për afatin e dorëzimit të formularëve për vetingun në polici, vetëm 300 efektivë nuk e kishin kryer këtë procedurë, ndërsa afati ligjor është deri në orën 24:00. Lajmi konfirmohet nga burime të Ministrisë së Brendshme, të cilat bëjnë me dije për Ora News se deri në mesditë, formularët e vettingut i kishin plotësuar 11.700 efektivë, nga 12 mijë policë që do t’i nënshtrohen këtij procesi. Duke qenë se policët, punonjësit e Gardës dhe SHÇBA-së, kanë edhe disa orë afat për të dorëzuar 3 formularët, atë të pasurisë, karrierës dhe pastërtisë së figurës, drejtuesit e Ministrisë së Brendshme janë optimistë se ky proces do të përmbyllet ashtu siç ishte parashikuar dhe dorëheqjet do të jenë në numra të papërfillshme. Deklaratat e fundit nga kjo Ministri se nuk do të ketë penalizime për plotësim gabim të formularit, kanë shtuar edhe flukset e dorëzimeve. Kohët e fundit u fol për dorëheqjen e afro 500 efektivëve, shifër kjo e deklaruar nga Sindikata e Policisë, nisur nga vështirësitë për plotësimin e formularëve. Përpos pasurisë që policët kanë vendosur nga puna e tyre në shtet, atyre u është lënë edhe mundësia e deklarimit të pasurive informale, pa penalizim, deri në limitin e 1.5 milionë lekëve të reja.