Në ditën e 11-të të protestës qytetare në Tiranë, është shfaqur në shesh edhe Pëllumb Pilinçi.
Në një prononcim për mediat, Pilinçi deklaroi se jo vetëm që qëndron pas protestës aktuale para Kryeministrisë, por se është i angazhuar edhe në organizimin e protestave të tjera në rajon, përfshirë atë të studentëve shqiptarë në Maqedoninë e Veriut.
I pyetur për synimet e tij politike, Pilinçi shkoi edhe më tej, duke shpallur se Edi Rama “ka rënë” dhe se ai vetë e ka tashmë gati qeverinë teknike.
“Erdhi përfundimi i komunistëve dhe agjentëve që kanë dalë vërdallë. Ne kemi ngritur studentët, ne organizojmë këtë, por janë 7-8 vetë që është futur nga Sali Berisha dhe Edi Rama. Data 13 është dita e fundit e agjentëve, spiunëve që paguhen dhe hiqen trima. Policia është këtu dhe është duke kontrolluar, policia është në favor të shqiptarëve. Drejtori i policisë është një hero i kombit. Edi Rama ka rënë. Qeverinë teknike e kemi krijuar”, tha ndër të tjera Pilinçi.
