Udhëtimi me tren duket një histori nga e kaluara, megjithatë rritja e çmimit të naftës e për pasojë kostos së udhëtimit mund të bëjë që qytetarët ta mendojnë këtë alternativë.
Sektori i hekurudhës në Shkodër, ka rikthyer në punë trenin e linjës Shkodër-Laç, çdo të martë në orën 06:00 dhe kthimi në orën 12:45.
Çmimi i biletës vajtje-ardhje është vetëm 150 lekë dhe udhëtimi zgjat 2 orë.
“Hekurudha Shqiptare ka vënë në dispozicion një tren për besimtarët. I cili do të kryejë këtë destinacion Shkodër Laç dhe anasjelltas. Çmim Shkodër-Laç vajtje është 95 lekë, ndërsa Shkodër-Laç dhe anasjelltas është 150 lekë të reja”,-tha Astrit Pasha, Shef Sektori në Hekurudhën.
Hekurudha Shkodër-Vorë ishte një nga hekurudhat që ndërtoi regjimi komunist në Shqipëri në vitin 1985.
Ajo fillonte që nga stacioni hekurudhor në Vorë e përfundonte në Shkodër.
Prej vitesh ky sektor ka degraduar, ndërsa linja Shkodër-Laç përdorej në 98 për qind të rasteve për transportin e mallrave./Lajmi.Al
