Zgjedhjet vendore të programuara më 30 qershor 2019 pritet të hapin të tjera debate mes palëve politike. Por ndërkohë që “stuhia” mes mazhorancës dhe opozitës jashtë Parlamentit vijon, Komisioni Qendror i Zgjedhjeve ka nisur procedurat e prokurimit për të siguruar materialet që do të përdoren në këto zgjedhje.
Dy procedurat e para duket se janë blerja e bojës “timbruese” (shënjuese). Referuar dokumenteve kjo bojë duhet të ketë një sërë karakteristikash si të jetë e dukshme me shikim të lirë, të mos hiqet të paktën për 24 orë, të ketë efekt të menjëhershëm, me ngjyrë të zezë. Po kështu boja duhet të jetë e padëmshme për organizimin si dhe e pacenueshme nga agjentët atmosferikë. Fondi limit për këtë procedurë është caktuar në 12.1 milionë lekë. Një tjetër procedurë e hapur po nga KQZ është ajo për blerjen e vulave (kodeve) të sigurisë për zgjedhjet vendore të këtij viti.
“Vulat me kodet e sigurisë që do të përdoren në zgjedhjet për Organet e Qeverisjes Vendore të datës 30 qershor 2019 të jenë të reja, me ngjyrë të bardhë dhe me numër unik 6-shifror. Vulat me kodet e sigurisë rezervë që do t’u dërgohen qendrave të votimit, të jenë të reja dhe të kenë ngjyrë të verdhë” thuhet në dokumentet e bëra publike nga KQZ dhe që sqarojnë specifikat e procedurës. Për këtë procedurë, fondi limit në dispozicion është 26.2 milionë lekë.
Subjektet e interesuara do të duhet që të paraqesin ofertat e tyre lidhur me ketë procedurë deri në 28 mars 2019 pasi ky është afati që ka lënë Komisioni Qendror i Zgjedhjeve.