Kreu i Partisë Demokratike Lulzim Basha ka publikuar një video në të cilën thekson se përgjatë 8 viteve qeverisje nga Edi Rama, Shqipëria ka regjistruar sipas tij papunësinë më të lartë në histori.
Sipas tij kryeministri aktual nuk mund të sjellë ndryshimin në Shqipëri, ndaj fton qytetarët që më 25 prill të votojnë PD.
“Per 8 vite me Ramën, Shqipëria regjistroi papunësinë më të lartë në histori. Ai nuk do të sjellë dot kurrë ndryshim. Ai është problemi. Më 25 Prill – e gjithë Shqipëria voton 9, për punësim, për ndryshim!”, shkruan Basha krahas videos.
Ditën e djeshme kujtojmë që kryeministri Edi Rama i bëri ftesë publikisht Lulzim Bashës për të bashkëpunuar pas zgjedhjeve të 25 prillit, por kërkoi ‘shkëputjen’ e tij nga Ilir Meta dhe Sali Berisha, mirëpo Basha e ka refuzuar duke thënë se Rama nuk do të bëhet kurrë pjesë e qeverisë së tij.
