Pas vetëm pak orë qetësim të situatës, kanë nisur reshje të dendura të shiut në kryeqytet.
Pas reshjeve të shiut, uji ka vërshuar në disa rrugë kryesore të Tiranës.
Si pasojë e motit të keq është shkaktuar dhe trafik i rënduar, ndërsa zona më problematike paraqitet zona e ‘Don Boskos’ dhe ‘Komuna e Parisit’.
Që prej ditës së djeshme disa qytete të Shqipërisë u përfshinë nga stuhia ‘Ciaran’, e cila shkaktoi dëme të mëdha materiale dhe qarkullimi.
Sipas parashikimit të Meteoalb, vendi ynë do të vijojë të jetë nën ndikimin e masave ajrore të paqëndrueshme duke bërë që vranësirat dhe shirat të jenë prezente herë pas here shirat do të paraqiten në formë shtrëngate shoqëruar me stuhi të forta ere.
Më të theksuara reshjet do të jenë në zonat veriperëndimore të Shqipërisë. Parashikohet që gjatë pasdites dhe mbrëmjes të ketë dobësim të intensitetit të shirave në pjesën më të madhe të territorit duke lënë me rrebeshe të përkohshme skajin veri-veriperëndimor.
Gjatë natës pritet përmirësim gradual i kushteve atmosferike në vend. Temperaturat e ajrit do të pësojnë rënie të ndjeshme në të dy vlerat ekstremale ditore duke u luhatur 5°C minimalja deri në 20°C maksimalja në rang vendi.
Era do të fryjë mesatare dhe e fortë me shpejtësi 45 km/h nga drejtimi Jugperëndimor, duke krijuar në brigjet detare dallgëzim 3 ballë.
Dje vendi ynë u godit nga stuhia ‘Ciaran’ që tashmë ka goditur pjesën më të madhe të Evropës duke shkaktuar dëme të shumta dhe viktima. Shërbimi Meteorologjik Ushtarak paralajmëron se reshjet e shiut në formën e shtrëngatave do të vijojnë deri të dielën.
