Këngëtarja Ruenca Haxhiaj, e njohur me emrin e artit Enca, është arrestuar nga Shërbimet e Komisariatit Nr. 1 në Tiranë, pasi në ballkonin e vilës së saj në zonën e Lundrës kishte mbjellë kanabis në vazot e luleve.
Efektivët kanë marrë informacion për këtë veprimtari të jashtëligjshme dhe kanë zbarkuar në lagjen me vila të pasanikëve dhe VIP-ave në zonën e Lundrës.
Gjatë kontrollit të vilës së Ruenca Haxhiaj, janë konstatuar në pjesën e ballkonit pesë vazo lulesh me kanabis. Siç shihet dhe nga kjo fotografi që shpërndan zyrtarisht Policia e Tiranës, bimët janë në një gjatësi të konsiderueshme.
Në këto kushte, është bërë arrestimi në kushtet e flagrancës të këngëtares 27 vjeçare, kurse lënda narkotike është sekuestruar në cilësinë e provës materiale. Materiale në ngarkim të Encës i kanë kaluar tashmë Prokurorisë së Tiranës.
Njoftimi i plotë – Drejtoria Vendore e Policisë Tiranë
Shërbimet e Komisariatit të Policisë Nr. 1, në vijim të punës për goditjen e paligjshmërisë, pas informacioneve të siguruara nga inteligjenca policore, se një shtetase kishte kultivuar bimë narkotike, në ballkonin e banesës së saj, kanë organizuar dhe finalizuar operacionin policor të koduar “Balcony”.
Si rezultat i këtij operacioni u vu në pranga shtetasja R. H., 27 vjeçe, banuese në Lundër.
Gjatë kontrollit në banesën e 27-vjeçares, në ballkon, shërbimet e Policisë gjetën dhe sekuestruan në cilësinë e provës materiale, bimë të dyshuara narkotike kanabis, të kultivuara në vazo.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
