Superliga shqiptare nuk është një opsion për momentin për Mërgim Mavraj. Pavarësisht interesimit nga ana e Kukësit, futbollisti i përfaqësues shqiptare do të vijojë të jetë pjesë e futbollit gjerman. Pas një viti shumë të vështirë ku fillimisht u transferua te Arisi i Selanikut, Mavraj kaloi te Ingloshtad gjatë merkatos së dimrit, një aventurë që zgjati po aq pak pasi ekipi zbriti në kategorinë e tretë.
Qendërmbrojtësi këtë të mërkurë është prezantuar zyrtarisht si futbollist i Grojther Fryth, skuadër që militon në Bundesligën e dytë. Për Mavraj është një rikthim pasi në kaluarën teksa është aktivizuar për tre sezone me këtë skuadër, nga viti 2011-2014, duke regjistruar 119 ndeshje me këtë fanellë. Në një intervistë për faqen zyrtare të klubit, Mavraj theksoi se nuk kam ardhur këtu për të mbyllur karrierën.
Drejtuesit e klubit më bindën me projektin dhe lojën që duam të aplikojmë. Dua ta ndihmoj skuadrën për këtë”, u shpreh Mavraj. Edhe drejtori sportiv i klubit Rashid Azuzi tha se Mavraj do ta ndihmoj skuadrën me eksperiencën e tij, ndërsa shtoi se mbrojtësi ka një personalitet të fortë dhe do të luaj një rol të rëndësishëm edhe për të rinjtë. Nuk munguan komplimentet as nga trajneri i cili shprehet se Mavraj është një lojtar i cili pozicionohet mirë dhe i fortë në luftën ajrore.
