Adriatik Lapaj, gjatë një prononcimi për emisionin “Të Paekspozuarit” në MCN TV, tha se Edi Rama përdori Endri Shabanin, për të sabotuar hyrjen e tij në Parlament dhe sot e shpërbleu duke e bërë Avokat Populli. 

Lapaj ka nisur të protestojë para zyrës së Ramës duke fjetur aty bashkë me disa të rinj të tjerë, të cilët kërkojnë rrëzimin e qeverisë. Ai u ka bërë thirrje qytetarëve të bashkohen në protestë. 

Biseda: 

Adriatik Lapaj: Ai (Rama) është i shqetësuar sepse e di ç’do të thotë të të vijnë poshtë zyrës njerëz që bashkohen në palcë të dimrit për të fjetur dhe rezistuar përballë, pasi gjërat janë shumë keq. E nisa i vetëm, por tashmë në ditën e tretë po shtohet numri i të rinjve, që qëndrojnë këtu gjithë natën dhe brenda pak ditësh do të jetë sasi e jashtëzakonshme njerëzish. Po flasim përballë regjimit tragjikomik të Ramës, që ka shkaktuar gjendje tragjike në realitetin e jetës tonë të përditshme, duke na thënë që gjykata shqiptare nuk pezullon dot ministren, se nuk qeveriset dot vendi. Të gjithë e dimë se KM mund të emërojë dhe shkarkojë ministra, ky mund të shkarkojë Ballukun dhe të vazhdojë, por i ka ngelur sharra në gozhdë dhe ka kaluar në mbrojtje kolektive. Nga reagimi i shoqatës së gjyqtarëve, për herë të parë, si kurrë më parë, iu bë me dije të mos zgjasë gjymtyrët e tyre. Ai është individi që bashkë me një njeri krejt pa vlera (Endri Shabani), që i binte gjoksit si njeri kundër sistemit, sot dëshmoi se pengoi lëvizjen tonë me 64 mijë vota. Autori i kësaj ishte Edi Rama.

Ylli Rakipi: Në këtë moment po votohet partneri yt, po bëhet Avokat Populli, mos duhet të ndryshosh trajektore, të hedh ai një gjë, me ndihmën edhe të opozitës?

Adriatik Lapaj: Ti zoti Rakipi e di mirë, që ai përmes të dërguarve të vet më ka kërkuar të bëhem pjesë e qeverisë dhe e kam refuzuar. Ai ka dërguar njerëz të bëhesha palë, duke ofruar disa poste dhe e kam refuzuar. Pasi më kanë kërcënuar dhe shantazhuar, kanë bërë telenovelën e shëmtuar, me të futurin e vet, tradhtarin, që tani i doli koka. Regjimi i Ramës po çmontohet në sytë e shqiptarëve. Edi Rama, është regjisor dhe skenarist i asaj shëmtie që bëri me atë që sot po zgjedh Avokat Populli, nuk ka shqiptar që nuk kupton pazarin e tyre, për të ndalur një zë të vërtetë dhe përfaqësues të mandatit më të votuar në historinë e Shqipërisë.

Me 85 vota pro, dhe 3 kundër Endrit Shabani u votua në Kuvend si Avokat i Popullit me mbështetjen e shumicës socialiste.

Me anë të një reagimi në rrjetet sociale, Shabani shkruan se u suprizua nga ky vendim.

“Mbrëmë mora për kandidaturën time si Avokat i Popullit një votëbesim sa të rëndësishëm dhe personalisht prekës, aq edhe surprizues për nga dinamika e zhvillimit në sallën e Kuvendit.

Mbetem akoma i befasuar me deputetët e opozitës, të cilët fillimisht më inkurajuan me dashamirësi, më dhanë firmat e tyre sipas ligjit dhe më uruan sukses, por më pas vendosën ta braktisnin kandidaturën time a thua se nuk ishte e tyrja.

Nga ana tjetër, deputetët e mazhorancës, fillimisht refuzuan të më jepnin qoftë edhe një firmë, megjithëse disa prej tyre i kam miq, me argumentin se PS nuk do të hynte në këtë punë të opozitës, por në momentin final më votuan që të gjithë, madje me votë të fshehtë, duke më besuar detyrën e Avokatit të Popullit.

E gjithë kjo dinamikë ishte diçka që s’do ta besoja dot po të ma tregonin më parë dhe nuk e lija dot pa e shënuar.

Megjithatë, me keqardhje për vijën e pakuptueshme të partisë së tyre, dua t’i falënderoj sinqerisht 35 deputetët e opozitës, të cilët me firmat e tyre më dhanë mundësi të kandidoj për këtë funksion kushtetues. I siguroj se nuk do t’u jap arsye për të menduar ndonjëherë se bënë gabim që më mbështetën në fillim apo se bënë gjënë e duhur që nuk më votuan në fund.

Gjithashtu, nuk mund të mos i falënderoj po aq sinqerisht deputetët e mazhorancës, pavarësisht se jam i vetëdijshëm që, më shumë se për mua, vota e tyre ishte një akt pjekurie politike për të zgjidhur ngërçin e stërzgjatur të institucionit dhe hedhur një hap domethënës për procesin e negociatave, ku ky ngërç shënohej si detyrë e pakryer shtëpie.

Dua të vlerësoj në veçanti faktin që duke më dhënë votën, deputetët e mazhorancës i dhanë përparësi si skuadër funksionimit të shtetit, dhe kapërcyen njerëzisht faktin që unë, si aktivist i angazhuar në radhët e opozitës, kam bërë dhe thënë gjëra për të cilat me siguri nuk iu ka ardhur mirë.

U shpreh respekt për nivelin dallueshëm më të lartë politik dhe i siguroj se në kryerjen e kësaj detyre të rëndësishme do të bëj më të mirën për të gëzuar respektin e të gjithëve.

Faleminderit!”, shkruan Shabani.

Endri Shabani do të jetë Avokat i Popullit për një mandat 5-vjeçar. Parlamenti votoi të enjten në mbrëmje kandidaturën e tij me 85 vota pro dhe 3 kundër.

Procesi i votimit ishte i fshehtë, por Euronews Albania mëson se Shabani ka marrë votat e 82 deputetëve socialistë dhe tre deputetëve të Partisë Socialdemokrate.

Partia Demokratike dhe Partia Mundësia nuk morën pjesë në votim. Ndërkohë, tre votat kundër janë të deputetit të Lëvizjes Bashkë, Redi Muçi, deputetes së Shqipëria Bëhet, Ana Dajko, dhe deputetit të PD-së, Artan Luku të cilët qëndruan në seancë.

Opozita kundërshtoi ashpër procedurën e ndjekur, duke deklaruar se kishte tërhequr firmat mbështetëse për kandidaturat për Avokat të Popullit dhe se Endri Shabani nuk ishte kandidaturë e mbështetur nga PD. Pavarësisht kësaj, mazhoranca vijoi me procesin duke kaluar në votim kandidaturat.