Opozita shqiptare është bashkuar rreth kandidaturës së aktorit të humorit Florian Binaj për Bashkinë e Tiranës, por duket se jo të gjitha grupimet janë në një mendje. Lëvizja “Djathtas 1912” ka refuzuar të mbështesë emrin e Binajt, duke e cilësuar si të papërshtatshëm për një përfaqësim të pavarur.

Në një intervistë për emisionin “Tema e Ditës” me Arbër Hitajn në RTSH, Enkelejd Alibeaj kritikoi ashpër si kandidaturën e Binajt, ashtu edhe atë të Ogerta Manastirliut nga radhët e mazhorancës. Sipas tij, të dy kandidatët janë pjesë e një loje politike të kontrolluar nga liderët e tyre respektivë.

“As Ramës dhe as Berishës. Si kandidatja e Ramës, Manastirliu ashtu edhe Binaj i Berishës, nuk po them kukulla, por nuk janë kandidatë të cilët nxjerrin një identitet të tyre të pavarur. Janë thjeshtë në një lojë të madhe midis Ramës dhe Berishës, ndaj në këtë rast kjo është e qartë”, u shpreh ai.

Për Alibeajn, Binaj nuk është kandidat i pavarur, por i zgjedhur nga vetë kreu i PD-së, Sali Berisha. Bashkimin e opozitës rreth Binajt, ai e konsideron si “hipokrizi”.

“PD është në paaftësi totale për të patur një kandidat të vetin politik. E paaftë, e dorëzuar. Shiti zgjedhjet te Rama. Është një opozitë e kontrolluar. Ky nuk është bashkimi rreth një kandidaturë, por rreth frikës për t’u  përballur me maxhorancës. Frika sepse, rezultati eventual, mesa duket e nuhasin, do të konsiderohej një goditje ndaj qëndrimeve të tyre. Bashkimi ndaj frikës çon në një bashkim hipokrizie. Është kandidat i Berishës, ai i vuri gishtin dhe i tha ‘t’i do të jesh kandidati’”, theksoi ai.

Gjykata Kushtetuese ka pezulluar dekretin e Presidentit Bajram Begaj për mbajtjen e zgjedhjeve të pjesshme vendore për kryetar bashkie në Bashkinë Tiranë më 9 nëntor. Ky vendim erdhi pas kërkesës së paraqitur nga Erion Veliaj, i cili kërkoi shfuqizimin si të VKM-së për shkarkimin e tij, ashtu edhe të dekretit presidencial për caktimin e datës së zgjedhjeve.

Pas vendimit të Gjykatës Kushtetuese, KQZ ka njoftuar ndërprerjen e përgatitjeve të procesit zgjedhor në bashkinë e kryeqytetit, ndërsa sqaroi se ky proces do të vijojë normalisht në 5 bashkitë e tjera të vendit.

Florjan Binaj është larguar nga moderimi i emisionit “Piranjat”, pasi shpalljes së kandidaturës për të garuar si kandidat i pavarur për zgjedhjet e parakohshme lokale për Bashkinë e Tiranës.

Këtë gjë e ka bërë me dije vetë Binaj, në nisje të emisionit të djeshëm. Gjatë fjalës së tij, aktori theksoi se ndryshimi vjen duke bërë një hap, ku ai e bëri hapin e tij, dhe tani pret që ta bëjnë dhe të tjerët.

“Sot është momenti im më i vështirë në këtë skenë. Sepse sot, duhet të ndahem me Piranjat. Po ndahem me nostalgji nga një punë dhe një program që e dua shumë dhe që e ndjej pjesë të trupit tim. Por po ndahem për diçka më të madhe.

Kanë qenë 3 vjet që më kanë rritur shumë si artist dhe si njeri. Për 3 vjet, në këtë familjen tonë të vogël, kemi denoncuar jo vetëm korrupsionin dhe abuzimin, por kemi ekspozuar edhe brishtësinë e shoqërisë shqiptare, plot me plagë shoqërore, morale dhe emocionale.

Për mua, humori nuk ka qenë thjesht argëtim, por një ilaç që zbut dëshpërimin dhe dhimbjen e njerëzve. E kam përdorur humorin edhe si mjet për të hapur sytë ndaj së keqes që na rrethon dhe për ta vënë pushtetin para përgjegjësisë.

Këto vite kam prekur gjithë Shqipërinë dhe jam takuar me mijëra njerëz, me halle të mëdha e të vogla. Kam dëgjuar prej tyre që duhet ndryshim, që diçka duhet të ndryshojë. Por kam kuptuar që janë të humbur, dhe shumica nuk e dinë, nuk e kuptojnë si bëhet ndryshimi.

Puna është: si ndodh ndryshimi? Unë e kam menduar gjatë: si bëhet ndryshimi? Si vjen ndryshimi? Duke hedhur një hap. Ndryshimi vjen vetëm kur dikush bën një hap. A flasim për ndryshim? A themi: “Kush do ta ndryshojë këtë vend?”

Unë e bëra hapin tim. Pas meje, një tjetër. Dhe një tjetër. Dhe një tjetër. Le të bëhemi 2, 3, 10, 100, 1 mijë, 100 mijë… Derisa të gjithë të bëjmë një hap për ndryshimin”, tha Florjan Binaj.

Partia Demokratike ka miratuar emrat e kandidatëve të pavarur që do të mbështesë për gjashtë bashkitë, ku do të mbahen zgjedhjet e pjesshme lokale.

Emrat e kandidatëve të PD-së në gjashtë bashkitë janë si më poshtë:

Florjan Binaj – Tiranë

Gabriel Guma – Tepelenë

Dionis Sota – Vlorë

Eduart Brahlika – Mat

Amarildo Hoxha – Cërrik

Pavlo Shkarpa – Berat

Po ashtu mësohet se emrat e këtyre kandidatëve janë njoftuar edhe në degët e Partisë Demokratike.

Ndërkohë pritet vetëm zyrtarizimi (ose njoftimi) nga selia qëndrore e PD-së për këta emra.

Ish-deputeti i Partisë Demokratike në Durrës, Ferdinand Xhaferaj, është emëruar këshilltar i Presidentit të Republikës, Bajram Begaj.

Emërimi është bërë gjatë ditëve të fundit, pas përfundimit të mandatit të tij si deputet në Kuvendin e Shqipërisë, ndërsa Xhaferaj nuk pranoi të rikandidonte në zgjedhjet e ardhshme parlamentare duke mos hyrë në primaret e PD.

Ferdinand Xhaferaj ka një karrierë të gjatë në politikë dhe në fushën e sigurisë kombëtare.

Ai ka kryer studimet universitare në Universitetin e Tiranës dhe në vitin 1999 ka ndjekur një specializim në Universitetin e Harvardit për “Politikat e Lidershipit”.

Më pas ka përfunduar një Master të Dyfishtë për “Siguri Ndërkombëtare” dhe “Çështje të Sigurisë Kombëtare” në Naval Postgraduate School në Shtetet e Bashkuara të Amerikës, ndërsa në vitin 2006 ka përfunduar studimet e doktoraturës pranë Akademisë së Mbrojtjes.

Në karrierën e tij politike, Xhaferaj ka qenë deputet i Partisë Demokratike për pesë legjislatura dhe ka mbajtur funksione të rëndësishme parlamentare, ndër to: kryetar i delegacionit shqiptar në Asamblenë Parlamentare të NATO-s (1996–1997), bashkëkryetar i Komisionit për Integrimin në NATO (2007–2009), zëvendëskryetar i Komisionit për Integrim Europian (2005–2009), anëtar i delegacionit shqiptar në Parlamentin Europian (2005–2009), si dhe zëvendëskryetar i Komisionit të Sigurisë Kombëtare (2021–2025).

Gjatë viteve 2009–2011, ai ka shërbyer si Minister i Turizmit, Kulturës, Rinisë dhe Sporteve, periudhë në të cilën u njoh për kontributin e tij në promovimin e turizmit dhe trashëgimisë kulturore shqiptare.

Përveç angazhimit politik, Xhaferaj ka pasur edhe një veprimtari akademike të gjerë, duke ligjëruar në Akademinë Ushtarake, Universitetin e Durrësit dhe Kolegjin Universitar “Bedër”. Ai është autor i monografisë “Deballkanizmi i Ballkanit”, botuar nga shtëpia botuese “Dudaj”, dhe ka marrë pjesë në një sërë konferencash kombëtare e ndërkombëtare mbi sigurinë kombëtare dhe marrëdhëniet ndërkombëtare.

Ferdinand Xhaferaj njihet si njohës shumë i mirë i gjuhës angleze dhe italiane, ndërsa fushat e tij kryesore të interesit janë shkencat politike, siguria kombëtare dhe marrëdhëniet ndërkombëtare. 

Kujtim Cakrani, avokati i Ilir Metës, në një lidhje direkte me studion e “Puls” nga Bruna Çifligu, në A2 CNN, tregoi se si po e përballon ish-Presidenti kohën në burg, gati një vit pas arrestimit.

“Zoti Meta shkruan çdo ditë, u përgjigjet pyetjeve të gazetarëve, komunikon me letra me njerëzit e tij dhe bën sport”, tha Cakrani.

“Është duke shkruar edhe një libër mbi angazhimet e tij gjatë 34 viteve të fundit. Do të jetë një libër që do i zbulojë shqiptarëve se çfarë ka ndodhur pas kuintave në politikën shqiptare”, shtoi avokati.

Në lidhje me rekursin e Metës, avokati deklaroi se nuk presin gjë nga Gjykata e Lartë.

“Kjo gjykatë është kthyer në noter të gjykatave të ulta, ka humbur rolin e saj dhe besueshmërinë te publiku. Gjykata e Lartë e ka humbur orientimin sepse duhet të dëgjonte avokatët, por merr vendime vetëm në dhomë këshillimi, pa dëgjuar palët. Qytetarët presin nga 8 vite që të vijë çështja në Gjykatën e Lartë dhe pastaj nuk të pranon rekursin. Kjo Gjykatë e Lartë është kthyer në makth për shqiptarët”, tha Cakrani.