Kryeministri Edi Rama ka dërguar zyrtarisht në Presidencë shkresën që njofton vakancat në drejtimin e gjashtë bashkive: Tiranë, Vlorë, Berat, Mat, Cërrik dhe Tepelenë. Dokumenti mban datën 30 shtator dhe i hap rrugë nisjes së procedurave institucionale për zëvendësimin e kryetarëve të shkarkuar nga Këshilli i Ministrave pas vendimit të Gjykatës Kushtetuese që konfirmoi pavlefshmërinë e mandateve të tyre.

Në listë përfshihet edhe Bashkia e Tiranës, ku një ditë më parë kryebashkiaku Erion Veliaj depozitoi në Gjykatën Kushtetuese një ankim për të kundërshtuar vendimin e Këshillit të Ministrave për shkarkimin e tij, duke e cilësuar atë të paligjshëm.

Procesi pritet të pasohet nga vendimmarrja e Presidentit për caktimin e datës së zgjedhjeve të pjesshme vendore në këto bashki.

Kryetari i partisë Mundësia, Agron Shehaj, ka deklaruar në një konferencë për shtyp këtë të hënë se forca që ai drejton nuk ka zhvilluar ende negociata me Partinë Demokratike për kandidatin e përbashkët të opozitës për Bashkinë e Tiranës.

Shehaj ka qenë i prerë se nuk do të ketë asnjë bisedim me PD-në, nëse paraprakisht nuk merret një vendim që kandidati opozitar të jetë jashtë politikës, i pakorruptuar dhe përbashkues për të gjitha partitë opozitare.

“Partia Mundësia ka alternativa shumë të mira, dhe jam i bindur se ato mund të fitojnë përballë kandidates socialiste. Deri tani nuk kemi bërë negociata me PD, por do të punojmë që të dalim me një kandidat të përbashkët jashtë partive politike. Do të ngulim këmbë për këtë. Ne jemi një parti politike e re, por kemi treguar se nuk i trembemi garës. Nëse PD na thërret në negociata për të parë emrat që ata kanë përzgjedhur, kjo është totalisht kundër asaj që besojmë. Nuk do të ulemi në negociata nëse nuk është vendosur më parë që kandidati të jetë jashtë politikës”, u shpreh Shehaj.

I pyetur nga gazetarët nëse ky qëndrim përbën një kushtëzim për PD-në, Shehaj tha se kërkesa për një kandidat të tillë nuk është kusht i partisë së tij, por një domosdoshmëri që e ka vendosur vetë elektorati.

“Unë nuk po e kushtëzoj askënd. Është elektorati që e ka vendosur këtë. Prej 12 vitesh opozita humbet, dhe nëse duam fitore, duhet të ofrojmë diçka ndryshe. Kemi nevojë për një kandidat të ndershëm, të pakorruptuar dhe jashtë politikës”, deklaroi ai.

Shehaj theksoi se Partia Mundësia ka alternativa reale për të fituar përballë kandidates së mazhorancës, por gjithashtu është e gatshme të bashkëpunojë me PD-në dhe opozitën, nëse bëhet një hap përpara në drejtim të përzgjedhjes së një kandidati përbashkues.

“Nuk mund të ulemi në tryezë pa e ditur se çfarë do të negociojmë. Nëse PD kërkon thjesht mbështetjen tonë për një kandidat të vetin, është e kotë të flasim. Por nëse duan të bashkëpunojmë për të gjetur një kandidat që bashkon opozitën dhe tërheq vota edhe përtej saj, atëherë po, kjo është një mundësi reale për fitoren. Nëse duam të zgjedhim një kandidat të pakorruptuar për Bashkinë e Tiranës, duhet t’i shtrijmë dorën të gjithëve – qoftë Qorit, Lapajt apo Shabanit”, përfundoi Shehaj.

Prej tre muajsh, Agron Shehaj dhe Partia Mundësia kanë dalë me propozimin se opozita mund ti fitojë zgjedhjet në Tiranë, vetëm nëse bashkohet rreth një kandidati jo-politik, të njohur në shoqëri dhe me integritet të lartë.

Në dhjetor të vitit të shkuar, Inida Gjata dhe Elena Kocaqi themeluan partinë Aleanca Kombëtare Shqiptare për të garuar në zgjedhjet e vitit 2025. Partia në thelb kishte dhënien e një kontributi të vlefshëm për vendin, por tashmë Zhaku duket se ka hequr dorë nga kjo.

Në programin “Rudina”, ajo thotë se ambicia politike është shuar brenda dy muajve. Me lirshmërinë e saj të zakonshme në të shprehur, Inida thotë se në të vërtetë shqiptarët nuk e duan ndryshimin ndaj refuzon t’i kushtojë kohën e saj një nisme të tillë kur mund ta shfrytëzojë për jetën e saj.

Intervista:

Inida Gjata: Unë mund të jem e para që themelon parti dhe brenda dy muajsh jep dorëheqjen nga ajo.

Rudina Magjistari: Ke hequr dorë nga ideja e politikës përfundimisht apo…

Inida Gjata: Jo, unë jam e interesuar vetëm të bëj një fushatë ku të ndryshohet Kodi Penal, të legalizohen disa gjëra të caktuara që mendoj unë që duhen legalizuar në Shqipëri, por e pashë pastaj të panevojshme që unë vetë personalisht që unë vetë të heq dorë nga jeta ime prej konteshe dhe kohën që mund t’ia dedikoj djalit tim apo familjes sime, miqve të mi, të rri dhe t’ia përkushtoj, ta shpenzoj në dobi të popullit shqiptar.

Rudina Magjistari: Pse?

Inida Gjata: Po nuk mendoj që e meriton!

Rudina Magjistari: Pse?

Inida Gjata: Sepse nuk e duan ndryshimin, llaf e kanë, me vepra nuk e duan. Kështu që, pse të bëj armiq unë kur i kam punët në terezi? Gjysma e miqve të mi në qeveri, pse të shaj unë qeverinë? Në rregull janë të gjithë, vazhdoni përpara, unë jetën time në rregull e kam./TvKlan

Dy ditë pas prezantimit që i bëri kryeministri Edi Rama dhe nisjes së detyrës, Ministrja e Shëndetësisë, Evis Sala, ia la detyrat vartësve dhe mbathi në Itali për dy javë, duke i vënë në dijeni se do të rikthehet në ministri më 2 tetor 2025.

Sipas informacionit të siguruar nga “Pamfleti”, ministrja Evis Sala shkoi të paraqitet në punën e saj si shefe e Qendrës së Imazherisë Diagnostike dhe Radioterapisë Onkologjike në Poliklinikën e Spitalit “Gemelli” në Romë, si dhe pedagoge në universitetin me të njëjtin emër.

Nuk ka shkuar për të bërë dorëzimet, por për të kryer detyrimet që ka në Itali me kontratë private, paralelisht me detyrën si Ministre e Shëndetësisë në Shqipëri sipas marrëveshjes me Ramën. Shkuarja e ministres dy javë në muaj në Itali lë të kuptohet se është bërë në dakordësi me Ramën, për të mbajtur vendet e punës në “Gemelli”, ndërsa dy javë të tjera do të jetë ministre në Shqipëri.

Sipas rregullores, ajo duhet të jetë çdo të mërkurë në mbledhjen e qeverisë, por për këtë duket se është menduar që Evisi të votojë vendimet online dhe t’i firmosë një herë në dy javë kur të kthehet në Shqipëri, ndërsa tenderët do t’i nënshkruajnë vartësit dhe do t’ia kontrollojë “kolegia” Diella.

Edhe në Parlament, ajo duhet të shkojë një herë në javë si ministre kur zhvillohen seancat, por fakti që nuk është deputete dhe nuk ka votë për qeverinë, e lë hapësirë të paraqitet dy herë në muaj kur të jetë në Shqipëri. Madje vetë Rama shkon një herë në tre muaj në seancat parlamentare.

Kur të kthehet nga puna në Itali, ministrja Evis Sala pritet të justifikohet se shkoi për të marrë platformat e reformimit të shëndetësisë në Shqipëri, me synimin për ta bërë mjekësinë “lider në Ballkan e konkurruese në botë”. Por nga fjala e saj ditën e prezantimit dhe nga nisjet vajtje-ardhje te punët e tjera në Itali, kuptohet se Evisi nuk e ka mendjen te problemet e shëndetësisë shqiptare.

Rama duket se e ka sjellë mikeshën Evis Sala në Shqipëri dhe e emëroi ministre për të “bërë lekë” sa të mundet, pa u penguar, dhe më pas për t’u kthyer në Itali. Ashtu si solli pas vitit 2013 shumë miq e mikesha nga jashtë, ndër to Mirela Kumbaron, e cila ka qenë tre herë ministre në sektorët kulturë, turizëm, mjedis e arsim, ku bëhen “lekë me thasë”.

Pyetja është: a e ka sjellë Rama edhe Evis Salën për të njëjtin qëllim? Sepse sektori i shëndetësisë ka miliona euro tenderë për investime, ilaçe, ushqime, pajisje dhe materiale mjekësore, që kalojnë nëpërmjet klientëve të njohur si Janis Karathanos, Tom Doshi, Kliti Hoti, Nikolin Jakaj, Dorian Sadiku, Rasim Hamzaraj, Lefter Lamaj, Nik Halili i grupit “Ndrangheta” etj., me të cilët kanë bashkëpunuar më parë Ilir Beqja, Ogerta Manastirliu dhe Albana Koçiu.

Evis Sala e di mirë se çfarë është bërë me fondet e shëndetësisë me “bekimin” e Ramës. Kjo është arsyeja pse ka pranuar këtë detyrë, për të përfituar dhe për t’u larguar sërish “pa i hyrë gjëmb në këmbë”.

Ministrja nuk është keq financiarisht, pasi përveç pagave të majme në Itali, vazhdon të paguhet 15 mijë euro në muaj si drejtuese në Universitetin “Western Balkans” të Spitalit Amerikan në Tiranë, të cilit tani si Ministre e Shëndetësisë do t’i firmosë pagesat për koncesionin e dializës./Pamfleti

Gjatë seancës së sotme plenare deputetja e Partisë Socialiste, për Qarkun e Fierit Zegjine Çaushi ka mbajtur fjalën e parë si deputete.

Ajo ka akuzuar deputetët e opozitës se kanë disa seanca që merren me ofendime dhe se sjellja e bërë prej tyre nuk mund të pranohet në çdo seancë. Teksa ka shtuar se mazhoranca është pasqyra e qytetarëve.

Deputetja ka thumbuar Gazment Bardhin, ashtu siç ka ndodhur edhe përgjatë gjithë fushatës ku ajo u bë virale në rrjetet sociale për “komunikimet” në distancë që i bënte atij dhe kundërpërgjigjet që merrte nga kreu i grupit parlamentar të PD. “Gazi nuk është se atë sjellje ka Gazi. Dhe ju të tjerët si Gazi do përfundoni.” është shprehur ajo.

Fjala e plotë:

Është e papranueshme të dëgjojmë të njëjtin fjalor. Këtu ne jemi pasqyra e qytetarëve dhe kjo sjellje nuk mund të pranohet në çdo seancë. Keni kaq shumë seanca që jeni marrë vetëm me ofendime, për program, për Diellën e për çdo gjë tjetër. Ju e keni pasur mundësinë që të dëgjonit programin, dhe ishit ju që e kthyer atë seancë të parë që ne deputetët e rinj mezi po e prisnim arritët ta ktheni në kaos. Të kthehemi në normalitet. Gazi nuk është se atë sjellje ka Gazi. Dhe ju të tjerët si Gazi do përfundoni.