Gazetari dhe publicisti Nikollë Lesi foli për problemet e opozitës, teksa zgjedhjet e pjesshme të Tiranës janë në prag dhe PD ende nuk ka ndonjë kandidat përballë Ogerta Manastirliut.

Gjatë intervistës për “News 24”, Lesi deklaroi se qeveria Rama do të rrëzohet vetëm nëse opozita arrin që të nxjerrë në shesh mbi 100 mijë njerëz, duke e mbushur plot bulevardin nga sheshi “Skënderbej” deri tek “Nënë Tereza”.

“Tha se me Ramën nuk shkojmë në zgjedhje. Kërkoi qeveri teknike. Ndryshuan kodin zgjedhor që kryetarët e partive të kenë listën e sigurt. Edhe këtë rast do bashkëpunojnë. E kam bindje ,që nëse në një vend është problem qeveria, këtu në Shqipëri problem është dhe opozita. Se nuk ka opozitë të fortë. Opozitë e fortë ka qenë ajo e 2004-ës, kur rrëzoi Fatos Nanon. Kjo është qeveri e vazhdimësisë. Dhe Rama do ndryshojë çfarë tha në parlament. nëse ke  njerëz 100 mijë veta, nga sheshi nënë Tereza në sheshin Skënderbej edhe e rrëzon. Problem është mazhoranca, por më problem sot për shoqërinë shqiptare është opozita që nuk krijon besim”, tha fillimisht Lesi.

Lesi deklaroi me siguri se opozitën e pret humbja në bashkinë e Tiranë, pasi as Tabaku dhe Alimehmeti nuk do kandidojnë. Sipas tij, opozita fiton zgjedhjet në kryeqytet vetëm nëse ndodh ndonjë mrekulli.

“Dhe Tirana nëse nuk kandidon Ilir Alimehmetin që është figura më e njohur, më mbledhëse, që nuk do kandidojë më tha nuk futem në zgjedhje të pjesshme. Do kandidojë ndoshta për 4-vjeçarë. Dhe ka të drejtë. As Tabaku nuk kandidon. Pse do humbi mandatin. Vetëm të ndodhë mrekullia, me këtë lidership të PD-së me mungesën e besimit që ka në elektorat. Me aq sa duken bathët, përveç Alimehmetit që mund ta çonte aty aty fushatën me vota, të tjerët asnjë nuk fiton. Tirana po e them paraprakisht nuk e lëshon Partia Socialiste. Ogerta e njoh personalisht, besoj se ishte surpriza, ia la si fakt të kryer. Ogerta është nga ministrat karizmatikë dhe lëviz, është popullore. Beteja me Ogertën është e vështirë me PD-në. Beteja në Tiranë do jetë vetëm nëse PD-ja gjen një njeri të jashtëzakonshëm”, përfundoi Lesi.

Deputeti i Partisë Demokratike, Klevis Balliu, foli për zgjedhjet e ardhshme të Tiranës, si dhe analizoi politikën aktuale nga pikëpamja e tij dhe e forcës politike që ai përfaqëson.

Ashtu sikurse demokratët kanë thënë e më parë, Balliu u shpreh se në vendin tonë ka një ndikim të madh të kriminelëve. Ai tha se këtë deklaratë, e pohon dhe i deleguari i Këshillit të Evropës që mbikëqyri procesin zgjedhor të 11 majit.

“Problemi në Shqipëri është me kartelët. Këtë nuk ua them unë. Këtë e thotë kryetari i eurodeputetëve të deleguar për të vëzhguar procesin zgjedhor në Shqipëri, nga Këshilli i Evropës, edhe e tha këtë në Këshill të Evropës që në Shqipëri rotacionin nuk e lejon mafia”, tha ai.

Më tej, Balliu u shpreh se në kohën e PD-së në qeverisje, Noka, i cili ishte dhe ministër i Brendshëm, nuk ka “lejuar” që kriminelët të jenë në “qarkullim”, por i burgoste. Kështu, nga ana tjetër, demokrati akuzoi socialistët se i ka kriminelët “aleatë”, e janë pjesë e Parlamentit në siglën e PS-së.

“Këto janë të pamohueshme. Flamur Noka mund të të pëlqejë, mund të mos pëlqejë. Por, kur Flamur Noka ishte ministër i Brendshëm kriminelët shkonin në burg jo në Parlament. Ky është ndryshimi themelor i Partisë Demokratike me Partinë Socialiste. Ne kriminelët i kemi armikë, këto kriminelët i kanë aleatë”, tha ai.

Por, sipas Balliut, sa më i madh të jetë një skandal lidhur me figurën e një personi që ka detyrë publike, pasuesi i tij merr po aq shumë vota pro. Këtë, demokrati e cilësoi si një “rekord global” të Shqipërisë, teksa përmendi skandalet e Gjicit apo Xhelilit në Durrës. Duke e rikthyer vëmendjen në Tiranë, Balliu tha se e gjithë kjo bashki është në burg, e për këtë arsye, logjikisht opozita fiton.

“Nëse do të kishte një proces zgjedhor, e besoj se këtu bijmë dakord të gjithë, se është i vetmi vend dhe mund të jetë rekord global, që sa më i madh skandali të jetë në Shqipëri, aq më shumë rriten votat e atij që bëri skandalin. 

Për shembull, u bë skandali i Safet Gjicit në Kukës, erdhi kolegu i vet fitoi me më shumë vota se Safeti. U bë skandali i Shukriut në Dibër, erdhi me më shumë vota kolegu i tij. U kap tani Erion Veliaj dhe e gjithë bashkia është në burg, se kanë vjedhur shqiptarët. Sot keni gjithë bashkinë në burg, e këtu thuhet a fiton dot opozita. Në cilin vend normal të botës, nuk do fitonte opozita?”, tha ai.

Edhe pse nuk dihet ende kandidati i Partisë Demokratike për Tiranën, Balliu siguroi se asnjë demokrat nuk do i bëjë “bisht” garës.

“Asnjëri prej nesh nuk do t’i bëjë bisht garës. Ne jemi në një proces që nuk mund të shkohet duke thënë ky është kandidati im, sepse jemi e në një proces diskutimi e me faktorë të tjerë”, u shpreh ai.

Duke qenë ende në temën e Bashkisë Tiranë, Balliu u shpreh se demokratët bazohen në parimin e interesit kombëtar, e jo atë partiak. Kështu, deputeti demokrat tregoi gatishmërinë për djegien e mandatit nëse është e nevojshme për qytetarët e Tiranës.

“Kam qenë deputet e më përpara, edhe e kemi treguar se nëse është për interes kombëtar, ne e djegim mandatin”, tha ai.

Deputeti i Partisë Demokratike, Klevis Balliu, ka vijuar me akuzat e opozitës kundër kryeministrit Edi Rama lidhur me një trafik që pretendohet se ka ndodhur në Aruba, me personazhe të trafikut ndërkombëtar të drogës.

Sipas Balliut, në hetimin e Prokurorisë belge të vitit 2024, emri i Ramës del i përfshirë në bisedat e baronëve shqiptarë të drogës, të pranishëm në një samit të organizuar në Aruba, Antilet Holandeze.

“Në një hetim të Prokurorisë belge të vitit 2024, Edi Rama dilte sërish ‘i fotografuar’ në bisedat e baronëve shqiptarë të drogës te pranishëm në samitin e Arubas. Po ashtu dilte edhe shtetasi Artur S., i njëjti që figuron si aktor kryesor edhe në interceptimet e shërbimeve italiane, të sapozbuluara në një libër bestseller në Itali të gazetarit Nello Trochia, botuar nga shtëpia e famshme ‘Rizzoli’. Në dosjen belge flitej edhe për një dhuratë luksoze, e ngjashme me verën ‘Romanee Conti’, por me një vlerë 10 herë më të madhe: një ore me kosto faraonike, 400 mijë euro. Po në atë dosje përmenden edhe Antilet holandeze, pra Aruba, që del qartë edhe në dosjen italiane të risjellë nga gazetari Trochia.”, deklaroi Balliu.

Balliu thotë se ka disa pyetje për t’i drejtuar kryeministrit Edi Rama në emër të Partisë Demokratike dhe në interes të publikut.

Pyetjet e tij:

A kishte me vete orën 400 mijë euro gjatë takimit në Aruba?

A ishte prezent dhuruesi i saj dhe çfarë marrëveshjesh apo dhuratash të tjera janë shkëmbyer mes tyre?

A i është shprehur falënderimi për orën dhe a e ruan atë në koleksionin e tij privat në Surrel?

Kush e ka shoqëruar në këtë takim dhe si janë ndarë përqindjet për ndërtimin e një “super-kulle” në zemër të Tiranës, e cila lidhet me bizneset e karteleve të drogës?

A ka lidhje mungesa e tij në Asamblenë e OKB-së në Neë York me pjesëmarrjen e tij në këtë samit të dyshuar?

Në fund të deklaratës së tij për mediat, Balliu ka paralajmëruar se këto pyetje dhe fakte do të sqarohen më në detaje në seancat e ardhshme parlamentare, duke kërkuar përgjegjësi dhe transparencë për këto akuza shumë serioze që përfshijnë figurën e kryeministrit.

Presidenti Bajram Begaj ka hapur zyrtarisht derën për importin masiv të punëtorëve, studentëve dhe emigrantëve nga Bangladeshi në një takim me Këshilltarin Kryesor të Bangladeshit, Muhammad Yunus gjatë vizitës në Nju Jork, ku mori pjesë në Asamblenë e OKB. Begaj duket se ka zbatuar një porosi të kryeministrit Edi Rama, i cili nuk e ka fshehur vizionin e hershëm për të zëvëndësuar shqiptarët e larguar nga vendi me punëtorë bangladeshas, që siç është shprehur Rama “nuk dinë shqip dhe nuk merren me thashetheme”.

Siç citohet nga mediat e huaja, Begaj është shprehur në takim se: “Ne kemi nevojë për punëtorë për vendin tonë, dhe disa kompani shqiptare kanë paraqitur tashmë aplikime për të punësuar nga Bangladeshi”.

Shqetësimit të Yunus se qytetarët e Bangladeshit duhet të udhëtojnë deri në New Delhi për të marrë një vizë në Shqipëri, Begaj iu përgjigj me propozimin për ta lehtësuar udhëtimin në vendin tonë përmes vizave dixhitale. Por Begaj nuk u mjaftua me kaq. Sipas mediave të huaja, ai është ofruar në takim edhe për të pritur studentë nga Bangladeshi.

“Presidenti Begaj njoftoi më tej se universitetet shqiptare janë të hapura për të regjistruar studentë nga Bangladeshi përmes programeve ekzistuese të arsimit ndërkombëtar, duke shënuar një mundësi tjetër për thellimin e bashkëpunimit mes dy vendeve” raportojnë mediat e vendit me më shumë se 175 milionë banorë.

Aktualisht, Bangladeshi është ndër 6 vendet që dërgojnë më shumë emigrantë në botë, kryesisht për shkak të varfërisë që ekziston në këtë vend.

Shifrat e emigracionit dhe punësimi i të huajve në Shqipëri

Të dhënat tregojnë se aktualisht Shqipëria është një nga 10 vendet me tkurrjen më të madhe të popullsisë në botë.

Banka Botërore raporton se në vitin 2024 popullsia u zvogëlua me -1.15%, ndërsa INSTAT shënon se më 1 janar 2025 vendi kishte 2 milion e 363 mijë e 314 banorë, një rënie prej 1,2% krahasuar me një vit më parë.

Censi i vitit 2023 tregoi se në një dekadë popullsia është pakësuar me 400 mijë banorë, duke mbajtur rekord negativ në Europë.

Në këtë boshllëk, bizneset kanë kërkuar gjithnjë e më shumë punëtorë të huaj. Vetëm në sezonin turistik qershor–shtator 2024 u punësuan 6.906 shtetas të huaj në turizëm, që përbëjnë 55% të totalit të punonjësve të huaj.

Për gjithë vitin 2024, Agjencia Kombëtare e Punësimit dhe Aftësive miratoi 12.654 Leje Unike, një rritje prej 29% krahasuar me 2023 dhe trefishim krahasuar me 2018. Megjithatë, pesha e tyre mbetet e ulët: punëtorët e huaj zënë vetëm 2,2% të totalit të të punësuarve në vend.

Vizioni i Ramës për “skllevër” nga Bangladeshi

Në mars 2021, gjatë një vizite në Shkodër, Edi Rama i tha një sipërmarrësi fasonerie se mund të merrte punëtorë të huaj me procedurë të thjeshtuar, por në momentin që nisi të fliste për dallimet me punëtorët shqiptarë, Rama zbuloi edhe interesin që kishte si politikan për zëvëndësimin e shqiptarëve me bangladeshas.

“I ke pronto, nuk dinë as shqip dhe nuk merren me thashetheme. Sa të fillojnë me mësu shqip, fillo ndërroi se i futet krimbi, jo politika, jo demokracia jo më the të thashë” u shpreh kryeministri në takimin që provokoi menjëherë polemika.

Deklarata zbuloi interesin e kryeministrit që Shqipëria të popullohet me punëtorët e huaj, të cilët shihen si njerëz të nënshtruar, pa gjuhë dhe pa të drejtë fjale. Ideja që punëtori duhet “të ndërrohet” sapo mëson shqip dhe fillon të interesohet për demokracinë, është një pasqyrë e një mentaliteti ku njeriu trajtohet si skllav dhe jo si qytetar i denjë i një shoqërie demokratike.

Deklaratat e Ramës dhe lutja e Begajt për autoritetet e Bangladeshit tregojnë se në vend që të përmirësojë ekonominë, shëndetësinë, arsimin, sigurinë për të nxitur rikthimin e emigrantëve dhe të ndalojë largimin e të rinjve shqiptarë, qeveria po e sheh zgjidhjen tek importi i fuqisë punëtore që nuk ka asgjë për të kërkuar dhe asnjë fjalë për të thënë.

Në këtë kuptim, punëtori pa zë, që punon vetëm për të ngrënë e fjetur, nuk është vetëm ëndrra e fasonerive shqiptare, por edhe modeli më i mirë për një pushtet që i do njerëzit skllevër, të bindur, të heshtur, që nuk kërkojnë llogari dhe as nuk ngrihen për të drejtat e tyre.

Bangladeshasit dhe revolucioni studentor i vitit të kaluar

Gjithsesi realiteti bie ndesh me mënyrën sesi kryeministri Edi Rama i përshkroi bangladeshasit në Shkodër, si punëtorë “pronto, pa gjuhë, që nuk merren me thashetheme” dhe që duhen zëvendësuar “sa të fillojnë të mësojnë shqip, e të flasin për politikë e demokraci”.

Që nga gushti 2024, Bangladeshi po qeveriset nga një qeveri e përkohshme me kryetar Muhammad Yunus. Kjo qeveri tranzitore u formua pas një vale të fuqishme protestash që çuan në dorëheqjen dhe largimin e kryeministres shumëvjeçare, Sheikh Hasina, në fillim të gushtit 2024.

Protestat u udhëhoqën nga studentët, të cilët kundërshtuan rikthimin e sistemit të kuotave për punësimet shtetërore, që favorizonte klientelën e lidhur me partinë në pushtet. Ato shpejt u shndërruan në një lëvizje të gjerë shoqërore.

Kur qeveria e Hasinës reagoi me dhunë dhe masa represive, duke përdorur forcën për të shtypur protestat, dhjetëra deri qindra qytetarë humbën jetën, shumë të tjerë u plagosën dhe mijëra u arrestuan.

Në kulmin e revoltës, më 5 gusht 2024, protestuesit arritën të thyenin barrierat dhe të sulmonin objekte shtetërore kyçe, përfshirë edhe zyrat e kryeministrisë. Përballë presionit të rrugës, Hasina u detyrua të linte vendin dhe të largohej drejt Indisë.

Ky u konsiderua “revolucion studentor” i Bangladeshit, që tronditi një regjim autoritar të konsoliduar prej dekadash./Lapsi.al

Kryetari i Lëvizjes Bashkë, Arlind Qori, kryetari i Lëvizjes ‘Shqipëria Bëhet’, Adriatik Lapaj dhe kryetari i Lëvizjes për Zhvillim Kombëtar, Dashamir Shehi, i janë përgjigjur në mënyra të ndryshme ftesës së deputetit demokrat, Belind Këlliçi, për t’u bashkuar dhe për të dalë me një kandidat të vetëm për Bashkinë Tiranë, në zgjedhjet e pjesshme lokale që pritet të mbahen së shpejti.

Në emisionin ‘NewsRoom’ në A2 CNN, Qori u tregua i prerë në përgjigjen e tij, ku mohoi kategorikisht një bashkëpunim me Partinë Demokratike për zgjedhjet e pjesshme lokale.

Qori tha se vetëm Lëvizja Bashkë është partia opozitare që lufton në të gjitha mënyrat qeverinë e kryeministrit Edi Rama, por edhe gjithë sistemin politico-ologarkik të krijuar në Shqipëri.

Nga ana tjetër, Shehi dhe Lapaj, e lanë të hapur një mundësi bashkëpunimi me Partinë Demokratike, por kjo sipas tyre mund të realizohet vetëm në kushte të caktuara, në rast të zgjedhjes së një kandidati të gjithëpranuar nga palët politike.

“Unë nuk mendoj se ka opozitë në Shqipëri, në kuptimin e një përbashkësie partish që i kundërvihen me ndershmëri një mënyre qeverisjeje. Opozita e mirëfillt, e vërtetë, jo vetëm kundër qeverisë, por edhe kundër krejt establishmentit politkiko-oligarkik në Shqipëri, është Lëvizja Bashkë dhe për të gjitha këto arsye, Lëvizja Bashkë do të garojë si parti me kandidatin e vetë në zgjedhjet për Bashkinë e Tiranës, kurdo që ato të mbahen”, tha mes të tjerash Qori.

“Ore unë do isha i lumtur të mbërrihej kjo punë dhe me atë gjënë time modeste po mundohem, të paktën me ndonjë ide. Varet nga personazhi që duan të vënë. Po u vu ndonjë djalë që tërheq, që ka një prestigj moral e politik, unë do i shkoja mbrapa me shumë kënaqësi. E kemi bërë këtë punë kur ka qenë Doktor Kosova dhe të tjerë dhe nuk ka qenë pa sukses fare. Por varet tani, nëse grupi i Berishës duan të vënë ndonjë nga ato që rrinë aty përqark, që nuk kanë hall të fitojnë zgjedhjet, por kanë hall që të përfaqësohen këto…”, tha mes të tjerash Shehi.

“Po diskutojmë me të gjitha strukturat tona dhe do të kemi një mendim zyrtar për këtë gjë, por bashkimi duhej kundër sistemit. Ju e mbani mend para zgjedhjeve që i kam shtrirë dorën e bashkëpunimit të gjithëve dhe mora baltë dhe sulm nga pas, deri te tradhtia. Por kush ishte më e rëndësishme, të çahej sistemi dhe të luftohej Edi Rama, apo të luftohet për Bashkinë për një vit që është mandati aty. Si mund ta fitosh bashkinë ti, duke pasur në qeveri atë aty. Tani do flasim të vërtetën?”, tha mes të tjerash Lapaj.