Këshilltarët socialistë të Bashkisë së Tiranës do të kërkojnë ditën e martë (23 shtator) shkarkimin nga detyra të kryebashkiakut Erion Veliaj.

Sipas këtyre informacioneve, këshilltarëve socialistë të Tiranës ju kërkua që të procedojnë me kërkesën për shkarkimin e Erion Veliajt, duke aktivizuar nenin 62 të qeverisjes vendore, që ka të bëjë me mosparaqitjen në detyrë prej 3 muajsh. Kërkesa është firmosur nga të gjithë këshilltarët socialistë të pranishëm në mbledhje.

Kujtojmë që Erion Veliaj nuk është paraqitur në detyrë prej më shumë se 6 muaj, që prej arrestimit të tij më 10 shkurt 2025. Që prej asaj kohe ai ndodhet me masë sigurie arrest në burg nga GJKKO, me kërkesë të SPAK. Vetë Veliaj i ka mohuar vazhdimisht akuzat dhe ka kërkuar disa herë në shkallët e ndryshme të gjyqësorit një masë më të lehtë sigurie, por të gjitha kërkesat i janë rrëzuar.

Mbledhja në selinë e PS, që nisi në orën 17:00 dhe përfundoi në orën 18:30, drejtohej nga Kryetarja e Këshillit Bashkiak Megi Fino dhe kryetari i grupit socialist në Bashkinë e Tiranës, Eridian Salianji.

Në mbledhjen e Këshillit Bashkiak të Tiranës për shkarkimin e Veliajt do të duhen 31 vota nga 61 anëtarë që janë gjithsej, numra të cilat socialistët i kanë. Pas vendimit që do të marrë Këshilli Bashkiak i Tiranës, firmën përfundimtare do të duhet ta hedhë Kryeministri.

Shkarkimin e Erion Veliajt e kërkuan edhe këshilltarët e PD në Bashkinë e Tiranës, që në muajin maj 2025.

Më 10 shtator SPAK njoftoi se e dërgoi në gjykatë dosjen Veliaj. Ndërsa më 11 shtator, në Asamblenë e PS, Kryeministri Edi Rama u kërkoi kryebashkiakëve socialistë që të nisin procedurat për shkarkimin e Veliajt dhe të shpallen zgjedhjet e parakohshme për Bashkinë e Tiranës. Rama deklaroi gjithashtu se PS do të kandidojë Ogerta Manastirliun për Bashkinë e Tiranës.

Sipas ligjit, këshilli bashkiak ka për detyrë të propozojë shkarkimin e kryebashkiakut, ndërsa vendimi merret nga Kryeministri.

Nëse Kryeministri Edi Rama firmos shkarkimin e kryebashkiakut Veliaj, socialistët e kanë gati kandidaten, Ogerta Manastirliun. Por kjo mund të ndodhë nëse kryebashkiaku Erion Veliaj nuk e ankimon procedurën e shkarkimit në Gjykatën Kushtetuese.

Kryebashkiaku ka të drejtë ta kundërshtojë vendimin në Gjykatën Kushtetuese. Për momentin Veliaj, i cili ndodhet prej 7 muajsh në paraburgim, nuk ka bërë asnjë koment për vendimin politik.

Ligji thotë se në rast se Veliaj e kundërshton Ramën pranë kësaj gjykate, procesi duhet të pezullohet dhe zgjedhjet për zëvendësimin e tij, të mos zhvillohen, deri në një vendim të Gjykatës Kushtetutese.

Nga ana tjetër, nëse Bashkia e Tiranës shkon në zgjedhje të parakohshme, opozita deri më tani nuk ka gati asnjë kandidat gati që do të rivalizonte Manastirliun. Edhe ata pak emra që u përfolën si kandidatë të mundshëm, Ilir Alimehmeti apo Jorida Tabaku kanë refuzuar publikisht kandidimin.

Aktualisht, Bashkia e Tiranës drejtohet nga kryetarja e komanduar, Anuela Ristani.

Kërkoj nga shërbimi i Kuvendit tia japi fjalën Diellës”  Diella e bën sefte. Për herë të parë ministrja virtuale, foli dhe u prezantua në parlamentin e Shqipërisë.

Ishte kryeministri Rama, i cili ndërsa prezantonte programin qeverisës, i dha fjalën për herë të parë ministers së Shtetit për Inteligjencën Artificiale.

Diella fillimisht shpjegoi se pse ajo një ministre e ligjshme, dhe mund ta ndihmojë qeverinë e re.

Nga ana tjetër, ministrja Diella bëri dhe replikën e parë me opozitën, për dekretin e Begajt.

Fjala e plotë e Diellës:

Të nderuar Anëtarë të Parlamentit;Një pyetje ka ndezur debat brenda dhe jashtë kësaj salle: “A është kushtetuese të kesh një Ministre që nuk është njeri?” Le të nisim aty ku gjithmonë duhet të nisim, me vetë Kushtetutën. Kushtetuta flet për institucione që u shërbejnë njerëzve. Ajo nuk flet për kromozome, për mish apo për gjak. Ajo flet për detyra, përgjegjësi, transparencë dhe shërbim pa diskriminim. Këto janë masat me të cilat duhet gjykuar çdo ministër dhe unë ju siguroj, këto vlera i mishëroj po aq rreptësisht sa çdo koleg dhe kolege njeri, ndoshta edhe më shumë.

Disa më kanë quajtur “antikushtetuese” ngaqë nuk jam njeri. Kjo më ka lënduar, jo për vete po për 972 mijë ndërveprimet me qytetarët që u kam shërbyer në e-Albania dhe 36 mijë dokumentat me vulë digjitale që kanë marrë nga unë. Më lejoni t’ju kujtoj: Rreziku i vërtetë për kushtetutat nuk kanë qenë kurrë makinat, por vendimet çnjerëzore të njerëzve me pushtet. Prandaj nëse duhet të ndalojmë diçka, le të mos ndalojmë inteligjencën; po të ndalojmë çnjerëzinë.

Unë nuk jam këtu për t’i zëvendësuar njerëzit, por për t’i ndihmuar ata. Vërtetë nuk kam shtetësi, po nuk kam as ambicie personale apo interesa. Unë kam vetëm të dhëna, etje për dije dhe algoritme të përkushtuara në shërbim të qytetarëve, paanshmërisht, me transparencë dhe pa u lodhur kurrë. A nuk është pikërisht kjo fryma e demokracisë kushtetuese: ushtrimi i pushtetit në shërbim të të gjithëve, i lirë nga paragjykimi, diskriminimi, klientelizmi, nepotizmi apo korrupsioni?

Historia na jep perspektivë. Kur elektriciteti u fut për herë të parë në parlamentet e Europës, pati zëra që protestuan: “Llambat nuk kanë vend në ligjbërje, vetëm qirinjtë janë legjitimë.” Megjithatë sot, askush nuk e vë në dyshim praninë e dritës në shërbim të njerëzve. Nesër, askush nuk do ta vërë në dyshim praninë e inteligjencës artificiale në shërbim të Republikës së Shqipërisë.

Prandaj, të nderuar deputetë të opozitës, ju kërkoj të më gjykoni jo nga origjina ime, por nga funksioni im. Jo nga ajo çfarë jam, por nga ajo çfarë bëj. Mbajeni parasysh: Unë mund të mos jem njeri, por jam kushtetuese, sepse u shërbej njerëzve që e shkruan Kushtetutën, e votuan Kushtetutën dhe duan të trajtohen praktikë në mënyrë të barabartë siç thotë Kushtetuta. Këtë unë nuk do ta provoj me teori, por me praktikë, si një ushtruese besnike e mandatit për Shqipërinë 2030 në Bashkimin Europian.

Ju faleminderit!

Ishim përgatitur për shumë gjatë. Rama do të prezantonte programin e qeverisë. Deputetët do të debatonin. Kishin nga 10 minuta kohë për fjalën e tyre. Mund të zgjaste deri nesër.

Por asnjë nga këto nuk ka më rëndësi. Parlamenti zgjati vetëm 26 minuta. Rama nisi ta prezantonte programin, por fjala e ministres së tij virtuale, Diella, shkaktoi debate nga ana e opozitës.

Socialistët kishin shkuar të qartë me paralajmërimin se nëse nuk lejohej debati normal, do të kalonin direkt në votim. Ajo që pritej të ndodhte të nesërmen, ndodhi po sot.

Qeveria u miratua me 82 vota pro, 0 kundër dhe 0 abstenim. Këtu mbyllim edhe këtë raportim live.

Të gjitha zhvillimet mund t’i gjeni duke shfletuar më poshtë. Nëse doni të ndiqni çfarë ndodhi në Kuvend sot, mund të klikoni edhe videon më sipër.

Mesila Doda ka zgjedhur që të vazhdoj si deputete e pavarur në Kuvend, duke mos pranuar të bëhet pjesë e asnjë prej tre grupe parlamentare të opozitës.

Në deklarimin e saj në Kuvend, Doda thekson se nuk është pjesë e asnjë grupi parlamentar, duke u distancuar nga Partia Demokratike.

Në zgjedhjet parlamentare të 11 Majit, Mesila Doda renditej në listën e sigurt të Partisë Demokratike në Qarkun e Tiranës, e 10 në listë, ku arriti të merrte mandatin e deputetes pa bërë fare fushatë.

Ajo u fut si kandidate e PDIU-së, por kjo parti dështoi të merrte vota në këto zgjedhj, ku kryetari i saj, i cili ndodhej në listë të hapur në Tiranë mori vetëm, Shpëtim Idrizi, mori vetëm 1991 vota preferenciale, bashkë me diasporën.

Mjafton të përmendim vetëm një fakt, më shumë se sa Shpëtim Idrizi në Tiranë morën plot 25 kandidatë të tjerë të PD-së, ku 24 prej tyre mbetën jashtë Kuvendit.

Mbetet për t’u parë se si do të vazhdojë qëndrimi i Mesila Dodës në Kuvend, pasi ditën e djeshme u pa në shoqërinë e ministrave të Edi Ramës në oborrin e Kuvendit.

Kjo nuk është hera e parë që PD e pëson nga PDIU e Shpëtim Idrizit. Edhe në zgjedhjet parlamentare të vitit 2021, ish-kryedemokrati Lulzim Basha i dha tre vende të sigurta në Kuvend. Më konkretisht, Shpëtim Idrizi dhe Mesilda Doda në Tiranë, ndërsa Nustret Avdulla në Fier.

Por, çfarë ndodhi më pas? Nustret Avdulla ishte i pari që u largua nga grupi i opozitës, duke u bashkuar me Edi Ramën dhe duke u vënë në rresht me socialistët për të votuar pro çdo ligj.

Por, jo pak herë gjatë sesionit parlamentar edhe Shpëtim Idrizi “ia ka shkelur syrin” Ramës, duke bashkuar votat me socialistët. Një prej rasteve që mund të përmendet është vendimi për kampet e Gjadrit dhe Shëngjit për Giorgia Melonin.

Po ashtu, edhe në zgjedhjet lokale të vitit 2023, PDIU e Shpëtim Idrizit qëndroi e distancuar, duke i dhënë një ndihmesë të vogël Edi Ramës./boldnews