Forumi i Dialogut Politik i drejtuar nga Ermal Hasimja ka vijuar negociatat me partitë opozitare. Burime për A2CNN bëjnë me dije se negociatat e fundit kanë qenë të frytshme, duke bërë bashke 3 parti politike për Kodin Zgjedhor.

Mësohet se PD, Shqipëria Bëhet dhe LZHK kanë rënë dakord që të propozojnë sistemin propocional kombëtar në tryezën e reformës zgjedhore. Po ashtu janë dakord për lista 100% të hapura dhe koalicione parazgjedhore.

Tashmë mbetet që kjo dakordësi të prezantohet edhe si draft në Kuvend. Ndërkohë negociatat vijojnë edhe me parti te tjera opozitare.

Në një reagim në rrjetet sociale Forumi për Dialogun Politik bën me dije:

“Forumi për Dialogun Politik po punon për një marrëveshje të partive të opozitës për një qëndrim të unifikuar për kodin e ri zgjedhor. Gjatë javëve të shkuara kemi biseduar me drejtuesit e partive kryesore dhe kemi arritur një marrëveshje në parim, ndërkohë që punojmë për detajet konkrete. Sistemi proporcional kombëtar me lista të hapura dhe koalicione parazgjedhore është propozuar nga vetë Forumi dhe dy parti opozitare. Partia Demokratike ka pranuar propozimin. Aktualisht po punohet për detajet konkrete”.

“Forumi mendon se një sistem i tillë zgjedhor do të garantojë një përfaqësim më të drejtë të shqiptarëve, do të mundësojë garë më të ndershme dhe deputetë më përfaqësues. Ky sistem mundëson gjithashtu një përfaqësim më të drejtë të partive të reja opozitare. Forumi vlerëson lart qëndrimin konstruktiv të partive opozitare. Ky është një hap i rëndësishëm pozitiv për një opozitë më të fortë e të besueshme”, vijon reagimi. 

Në mungesë të transparencës, në mungesë të debatit politik, në mungesë të kushteve për të sqaruar simpatizantët e qytetarët, në mungesë të ligjit dhe funksionit të jetës parlamentare në vend, në mungesë të zgjedhjeve të lira e të drejta, në mungesë të shtetit dhe të demokracisë, shumë gazetarë dhe jo vetëm ata, sot po pyesin: Ku do të dalë Elisa Spiropali? Në fakt, në radhë të parë, një pyetje e tillë sado naive të duket, nuk shërben vetëm si një pyetje që kërkon të shpjegojë diçka, por shumë më shumë se kaq, mbi të gjitha, shërben si një ftesë për ta thirrur në tribunë dhe më shumë sesa për ta kuptuar, vlen për ta bërë të dukshme atë.

Publikja e znj. Spiropali nuk ka qenë pa kosto, madje as atëherë kur ishte bërë tabelë qitjeje dhe askush s’e kursente më për asgjë, por e vetëdijshme për atë që bënte dhe për koston që merrte, duke hequr dorë edhe nga dinjiteti e personaliteti, kur thoshte dhe bënte gjëra që ndoshta as vetë s’i besonte, kur e tallnin dhe e përqeshnin pikërisht për hir të rolit që merrte, një pyetje tjetër të vjen në mendje se për çfarë i vlente ky angazhim, politika, karriera? Mos vallë kaq i madh është përfitimi në politikë, sa i gjithë ky breshër sulmesh e goditjesh mbi brez e nën brez i duket asgjë, por thjesht një ves e pranueshme stine. Eh, në qoftë kështu, nëse ky është vektori që udhëheq znj. Spiropali, atëherë me siguri peshorja e asaj dhe e të gjithë atyre që po tentojnë ta kthejnë në skenë po anon siç duhet, dhe po, tani mund të themi se politika ia vlen me gjithë koston e lartë.

Në këtë përllogaritje shansesh dhe vlerash, ajo dhe të gjithë ata të tjerët, më shumë këta të skenës, duhet ta dinë se në kohën kur Elisa Spiropali hyri në radhët e Partisë Socialiste, mes fluksit të të rinjve që afroi Edi Rama, askush s’mund të vinte bast se pas ca kohësh, kjo ithanake do ia dilte që nga fundi i një formacioni të mbushur me gladiatorë, të kapërcente një e nga një shkallët për t’u ngjitur jo vetëm drejt parlamentit, por në krye të tij, si numri dy i shtetit. Dhe kjo e ka një shpjegim.

Elisa Spiropali nuk është një model. Nuk është as një dritë në fund të tunelit, as një ide dhe mbi të gjitha asnjë projekt. Ajo është thjesht një shprehje gjuhësore. Vetëm kaq. Sigurisht, punëtorët e skenës, ata që po lodhen çdo ditë për ta ngjitur në podiumin që vetë ndërtojnë dëshirojnë që ajo të jetë më shumë se një shprehje gjuhësore, më shumë se sa shfaqet dhe për hir të së vërtetës edhe më shumë se sa është. Kritikat e saj drejtuar mazhorancës socialiste nuk janë një rrufe në qiell të hapur, përkundrazi, Partia Socialiste, si mazhorancë drejtuese, arriti të fusë në Kuvend më shumë armë se libra, më shumë trafikantë se njerëz normalë, dhe si për të mos mjaftuar as kjo, në presion nga ndërkombëtarët u detyrua, së bashku me trafikantët e femrave dhe pistoletat, të votonin një ligj, që e dekriminalizonte Kuvendin e Shqipërisë, duke e shndërruar republikën shqiptare në republikën më të shëmtuar të Europës.

Elisa aty ishte atëherë, por kapakut të pusit ende nuk i ishte dhënë e shtyra që era e rëndë të ngrihej. Kur iu dha e shtyra përfundimtare atij kapaku dhe ne të tjerët e kuptuam se çfarë soji e sorollopi kishte brenda, Elisa Spiropali shoqërohej në Shkodër nga Pëllumb Gjoka, një nga personazhet e njohur të dosjes “Metamorfoza”. Me atë shoqërim dhe me rezultatin e fituar, me gjasë mund të ketë menduar se duke ftuar në ndihmë ca banditë, mund të shporrte disa banditë të tjerë. Po a ka gjë më fyese se sa kjo për shqiptarët? Më cinike dhe më raciste? Na thoni, a ka? Jo. Nuk ka. Një mentalitet i tillë i paragjykon shqiptarët. U heq atyre mundësinë se kanë aftësinë të rrëzojnë kriminelët nga pushteti pa u bërë palë me krimin.

Ajo është veç një shprehje gjuhësore se s’mund të jetë tjetër më shumë se kaq. Sepse, të bësh karrierë në politikë, pra, me pak fjalë, të ngjitesh nga fundi dhe të dalësh në krye të saj, duhet të mbështetesh nga një i fortë, i paprekshëm dhe me imunitet në shoqërinë e traumatizuar shqiptare. Ky është një mentalitet që modeli Elisa e ka shndërruar në zgjidhje, duke na rrezikuar ne si shoqëri dhe më shumë se sa na infekton, në fakt, infekton të rinjtë e Shqipërisë, të cilët për fat të keq janë ata që po ikin nga Shqipëria, edhe për shkak të modelit që ofron Elisa. Pasi, ky është një model në shumë raste i pakonkurueshëm.

Çfarë i thotë ky model asaj vajzës në Kiras, njeriut të varfër në Shqipëri. Ajo nuk ka mundësi të bëjë një karrierë normale. Jeta ia ka bërë të pamundur, trashëgimia nuk ia lejon, shkolla nuk i vlen, sepse Elisa s’e lejon. Modeli i saj është kostoja më e madhe e shoqërisë tonë. Është një model që s’e ndëshkojmë dot as me votë. Elisa e shkolluar në Kanada dhe Amerikë që të ecë larg, që të ngjitet lart, që të shfaqë luks dhe arrogancë kishte shumë nevojë dje për Pëllumb Gjokën dhe sot për Orik Shytin, i cili s’la gur pa lëvizur dhe presion pa bërë për ta çuar në Ministrinë e Infrastrukturës. Nuk ia doli. Kanë ndryshuar kohët dhe rrethanat. Jetojmë në paqartësi politike dhe këtë më mirë se Edi Rama nuk e kupton askush tjetër.

Megjithatë, në fund fare, punëtorët e skenës një gjë duhet ta kenë të qartë, angazhimi për Elisa Spiropalin s’mund të lexohet si investim për promovimin e një modeli ndryshe brenda familjes socialiste shqiptare, përkundrazi, gjithçka do lexohej si mbrojtje e kolateralit që dy burra të fortë shqiptarë kanë lënë si garanci në biznesin e madh të Edi Ramës. Kaq është historia. Hyni dhe zgjidhni./oranews.tv

Moderatorja e Top Story-t, Grida Duma, në një intervistë dhënë në emisionin “Breaking” në Top News ka bërë një analizë të detajuar të aktualitetit politik në vend.

Duke nisur nga tema më e nxehtë, ajo e reformës zgjedhore, Duma thekson se kryeministri Edi Rama dhe lideri i opozitës, Sali Berisha, janë të janë të dy në të njëjtën trajektore. Sipas saj, ata po e bëjnë bashkë reformën zgjedhore.

“Ne duhet të kuptojmë çfarë prodhon qasja e pozitës dhe opozitës. Ne duhet të kuptojmë çfarë bëjnë për shqiptarët. Ajo që ne duhet te ndjekim ne. Para zgjedhjeve, Berisha ka propozuar 100 deputetë, pas zgjedhjeve, Rama thotë të shkojmë në 101. Teoria e lojës për të shkuar me shumë mënyra në një rezultat të njëjtë. Ndryshojnë variablin dhe thënë këtë ajo që na habit në këto momente është që të dyja palët duan njëjtën gjë uljen e numrit të deputetëve. Shqetësimi i Ramës në mandatin e katërt nuk duhet të jetë tjetër, por të ketë lidhje me realitetin, jo ulja e numrit të deputetëve, që të shtojë drejtorët.
Shqetësimi i Berishës nuk duhet të ishin numrat, por mënyra se si zgjidhen këto deputetë. Dy liderët kërkojnë zvogëlimin e atyre të terreneve. Janë dy ndryshime që lidhen me mënyrën se si ulet terreni politik. Subjektet e reja varen nga mediat dhe frymëzimin e publikut nëpërmjet komunikimit”, tha Duma.

Lidhur me rolin që duhet faktori ndërkombëtar për reformën zgjedhore apo atë elektorale, Duma u përgjigj: “OSBE-ODIHR nuk ndryshon gjë në ekzekutiv dhe legjislativ. Ambasada SHBA dhe ambasada e Britanisë së Madhe kanë pas rol në marrëdhënien PS-PD. Sot ka një rënie të interesit për Ballkanin.
Për sa i përket momentit, SHBA e ka vëmendjen te lufta në Iran dhe nuk e ka vëmendjen për të ndërhyrë në Shqipëri. Ne duhet të ikim nga iluzionet që do vijnë ata dhe do të krijojnë zgjidhje. Zgjidhja dhe pengesa është brenda partive tona. Në këtë kuptim, ndërkombëtarët janë një faktor minor”.

Përsa i përket konfigurimit politik në vitin 2029, Grida Duma bëri një parashikim.

“Ajo që parashikoj unë është se me këtë mpirje që i ka bërë Rama dhe Berisha vendit shumica ka tendencën të shkojnë te PS dhe vetë Rama thonë se ne nuk jemi më të mirët, por më të mirë se ne nuk ka. Ndërkohë, PD thotë se ne nuk fitojmë se nuk ka zgjedhje me Ramën. Aksioma e tyre është se ne futemi në zgjedhje, por zgjedhje nuk ka. Shqetësimi do të ishte platformë ndërkombëtare e PD. Nëse opozita shpreson se të ikurit janë të pakënaqur, duhet të zgjidhë ngërçin e votave, si realizohet votimi elektronik në kohë rekord, etj”.

Por si i ka bërë llogaritë PD, sa do qëndrojë në opozitë?

“Unë e kam pyetur Berishën që PD a do ketë të njëjtën moshë biologjike, siç është lideri i opozitës. Nuk mund ti them Berishës si ta bëjë partinë, nuk mund t’ia japim këtë leksion. Ka një problem tjetër në të gjithë kampin opozitar, ka një mungesë dakordësie mes partive të vogla opozitare. Nuk kam dyshim që në PD ka njerëz me vlera dhe kontribute që mund të bëjnë më shumë, ashtu si në PS, ku Rama nuk ka nevojë për deputetët e vet sepse e bën çdo gjë vetë. Dy liderët e forcave kryesore politike e kanë mbyllur lojën vet”, analizoi Duma në përgjigjen e saj.