Bordi i Transparencës ka zhvilluar sot më 15 prill, mbledhjen e radhës, në të cilën ka vendosur çmimet tavan të shitjes me pakicë dhe shumicë për naftën dhe nënproduktet e saj.

Kështu, sipas sipas vendimit nafta me pakicë do shitet jo më shumë se 207 lekë për litër, duke u ulur me 8 lekë nga 215 lekë që ishte më parë.

-Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 207lekë/litri, ndërsa i shitjes me shumicë jo më shumë se 195 lekë/litër.

-Çmimi i shitjes me pakicë i nënproduktit benzinë e standardit SSH EN të jetë jo më shumë se 174 lekë/litri, ndërsa i shitjes me shumicë jo më shumë se 162 lekë/litër.

Çmimet e reja hyjnë në fuqi sot në orën 13:30 dhe do të jenë në fuqi deri në mbledhjen e radhës së Bordit, ku pritet rishikimi i tyre në varësi të lëvizjeve të tregut.

Bordi u ka bërë thirrje të gjithë operatorëve të shitjes me shumicë dhe pakicë që të zbatojnë me përpikëri vendimin, duke paralajmëruar se në rast shkeljesh do të merren masa, përfshirë edhe pezullimin e aktivitetit.

Në sqarimin e dhënë, referuar Aktit Normativ nr. 1, datë 3.4.2026, parashikohet se në rast se çmimi i shitjes me pakicë për gazoilin tejkalon 220 lekë/litër ose për benzinën 200 lekë/litër, aplikohet niveli 80% i akcizës. Megjithatë, duke qenë se çmimet e vendosura janë nën këto kufij, do të vazhdojë të zbatohet niveli i plotë i akcizës prej 100%.

Katër persona janë ndaluar nga Policia e Tiranës në lidhje me incidentin e ndodhur të martën ku një pallat 12-katësh në kryeqytet mori flakë. Nga zjarri shtatë persona u dërguan në spital, mes tyre edhe zjarrfikës që punuan për shuarjen e flakëve dhe evakuimin e banorëve.

Policia ka ndaluar administratorin e pallatit dhe menaxheren e marketit në afërsi të të cilit dyshohet se ndodhi zjarri.

Ndërkohë, ndërtuesi i pallatit është shpallur në kërkim policor, pasi do të merret në pyetje.

Të paktën 30 apartamente rezultojnë të jenë djegur, sipas verifikimeve paraprake, si pasojë e zjarrit që përfshiu dje pallatin 12-katësh, pranë QSUT-së. 30 apartamentet e djegura janë shkrumbuar plotësisht dhe janë jashtë përdorimit. Aktualisht po bëhet monitorimi një nga një i banesave, ku policia po përdor edhe dron. 

Grupi hetimor ka sekuestruar të gjitha kamerat e sigurisë pranë kompleksit të banimit dhe sipas hetimeve paraprake, zjarri mund të ketë nisur nga kati i parë, nga një biznes në këtë kompleks banimi. 

Gjithë fasada e pallatit 12-katësh u përpi nga flakët në më pak se një orë. Re të dëndura tymi mbuluan zonën dhe shkaktuan panik e frikë te banorët e pallatit dhe të godinave ngjitur, që fatmirësisht mundën të evakuohen në kohë. 11 persona mbetën të lënduar, mes të cilëve edhe dy zjarrfikës.

Dy banorë të pallatit kanë pësuar djegie sipërfaqësore, të konsideruara nga mjekët si të lehta, ndërsa të tjerët kanë pasur probleme asfiksie për shkak të tymit, por të gjithë pa asnjë rrezik për jetën.

Në orët e para të mëngjesit, pothuajse në të gjithë vendin është bllokuar lëvizja e qytetarëve me transportin publik.

Në Tiranë, në orët e para të mëngjesit, nga rreth 200 autobusë për afro 50 linja transporti, kanë operuar vetëm 115 prej tyre. Mungesa e mjeteve të transportit publik krijoi radhë të gjata dhe pritja në stacione, ku sipas qytetarëve sot koha e pritjes për të marrë këtë shërbim, ka qenë dyfish më e gjatë.

Në rrethe sipas shoqatave të Transportit Publik, sot numri i mjeteve të reduktuara ka arritur deri në 60%.

Në total, në të gjithë vendin funksionojnë rreth 450 linja të rregullta të transportit publik, një shërbim që ofrohet nga 250 operatorë.

Shoqatat e transportit paralajmërojnë për përshkallëzim të reduktimit të numrit të autobusëve në rast se institucionet nuk reagojnë për miratimin e kërkesave të tyre.

Kryetari i Shoqatës Kombëtare të Transportit Qytetës, Kostandin Foni, tha për “Monitor” se operatorët në të gjithë vendin nuk garantojnë vijueshmërinë e transportit as për ditët në vijim.

“Të gjithë operatorët, si në Tiranë dhe në rrethe janë të vendosur për reduktim të mëtejshëm të shërbimit dhe përshkallëzim në rast të mos reagimit. Në disa rrethe ditën e sotme reduktimi i mjeteve ka arritur deri në 60%. Të tjerë janë në vështirësi financiare deri në mbyllje të shërbimit. Kjo masë nuk vjen si dëshirë e operatorëve, por nga pamundësia financiare e tyre për të përballuar rritjen e kostove nga shtrenjtimi i naftës.

Nga përllogaritjet rezulton se në të gjithë vendin, nga të gjithë operatorët e transportit publik, shpenzohen rreth 850 mijë litra naftë në muaj. Pas rritjes së lartë të çmimit të naftës, vetëm transporti qytetës përllogaritet të ketë një kosto shtesë prej rreth 800 mijë euro në muaj. Dhe kjo situatë vijon që prej fillimit të muajit mars. Ndërsa ende nuk ka asnjë reagim nga institucionet shtetërore për dhënie të kompensimit për shtrenjtimin e naftës, që mbetet një nga kërkesat kryesore për garantimin e vijueshmërisë së shërbimit”.

Si Shoqata Kombëtare e Transportit Qytetas dhe Shoqata e Transportit Urban dhe Interurban kanë dërguar disa letra ministrisë së Ekonomisë, ministrisë së Financave dhe Bashkive për vështirësitë financiare të krijuara pas shtrenjtimit të naftës.

Prej tyre edhe në takimin e zhvilluar më 1 Prill me ministren e Ekonomisë është kërkuar të zbatohet skema e ngjashme e vitit 2022, ku për shkak të krizës së çmimeve operatorët u kompensuan 6 muaj për naftën me 100 lekë për litër.

Duke nisur nga dita e mërkurë do të reduktohet me 40 për qind flota e autobusëve në vend, bën me dije Shoqata Kombëtare e Transportit Qytetas dhe Shoqata e Transportit Urban dhe Interurban.

Në njoftim thuhet se mungesa e reagimit të qeverisë ka përkeqësuar ndjeshëm situatën financiare të operatorëve, raporton A2CNN.

“Kjo mungesë reagimi dhe veprimi konket ka përkeqësuar ndjeshëm situatën financiare të operatorëve, të cilët ndodhen tashmë në kushte tejet të vështira për të përballur vazhdimin e aktivitetit. Për pasojë ju bëjmë me dije se, duke filluar nga nesër do të reduktojmë numrin e mjeteve në qarkullim duke e ulur me 40 për qind flotën në shërbimin e transportit publik, si një masë e detyruar për përballimin e kësaj situate emergjente”, thuhet në njoftim.